Киев бара „Нинбершки суд“ за Путин

Западните земји мора да поддржат формирање на специјален суд за да се казни Владимир Путин за неговата инвазија на Украина, изјави украинскиот министер за надворешни работи.

Зборувајќи на онлајн настан одржан денес од страна на тинк-тенкот за надворешна политика Чатам хаус, Дмитро Кулеба рече дека Русија извршила „злосторство на агресија“ против Украина и на крајот „ќе биде одговорна за своите дела“.

„Целта на оваа иницијатива не е да го замени Меѓународниот кривичен суд или која било друга јурисдикција, туку да ја пополни празнината што постои во меѓународното право и да го искористи искуството на меѓународната заедница и меѓународното право за доброто на луѓето и светскиот поредок”, рече тој.

Експертите за меѓународно право тврдат дека е потребен нов трибунал бидејќи МКС има јурисдикција само за три злосторства – воени злосторства, злосторства против човештвото и геноцид – но не и за таканаречените злосторства на агресија во случајот со Русија. Тоа е затоа што Москва не потпишала конкретен статут на МКС според кој земјите се обврзуваат дека нема да вршат такви злосторства.

Ова значи дека МКС ќе се фокусира на тоа како била водена војната, истражувајќи конкретни дела кои претставуваат прекршување на законот за вооружен конфликт – но нема да може да ја гони Русија поради нејзината одлука да изврши напад против Украина на прво место.

„Прибегнувањето кон војна во Украина значи злосторство за агресија“, рече Филип Сендс, професор по право на Универзитетскиот колеџ во Лондон. „И тоа е она што доведува до индивидуална кривична одговорност според меѓународното право. Тоа е единственото злосторство што дозволува одговорните за севкупноста на ужасните настани на кои сега сме сведоци, да одговараат“.