Истражување откри нешто исклучително интересно за вијаграта и мажите, но експертите не се целосно убедени во тоа

Најновата студија покажа дека мажите кои користат вијагра имаат намален ризик од прерана смрт, но експертите не се целосно убедени. Еве зошто.

Според резултатите од неодамна објавената научна студија, мажите кои земаат вијагра за еректилна дисфункција може да имаат помал ризик од прерана смрт.

Споменатото истражување ги разгледа 14-годишните медицински досиеја на повеќе од 23.000 Американци кои земале вијагра според лекарски рецепт. Истражувањето го финансираше фармацевтската компанија Санофи. Анализата ги спореди здравствените податоци со оние од евиденцијата на 48.000 мажи во САД, кои не добиле споредлив рецепт.

Бидејќи Санофи ја продава сопствената верзија на вијагра наречена Стендра, резултатите од истражувањето може да се земат со резерва и не може да се исклучи конфликтот на интереси. Сепак, тоа не значи дека тие треба автоматски да бидат отфрлени.

Интересни резултати

Учесниците во студијата, објавена во научното списание Journal of Sexual Medicine кои земале вијагра (инхибитор на фосфодиестераза тип 5 или PDE-5i), според нејзините резултати, имале 39 отсто помали шанси да умрат од кардиоваскуларни болести, за разлика од мажите кои не го земале тој лек. Резултатите исто така покажале дека мажите кои земале вијагра имале 25 отсто помали шанси да умрат од која било причина за смрт и 13 отсто помали шанси да добијат срцев или мозочен удар.

Мажите кои земале поголема кумулативна доза на PDE-5i биле подобро заштитени од срцеви заболувања отколку мажите кои земале помала доза.

Истражувањето ја проверувало возраста, лековите, медицинската историја и статусот на пушење на учесниците, но од друга страна, студијата не можела да покаже каузалност.

Мажите кои избираат да земаат лекови како вијагра може едноставно да бидат поздрави на почетокот. Или нивната способност да се вклучат во сексуална активност по третманот можеби ги предизвикала придобивките за здравјето на срцето видени во студијата, наспроти подиректниот ефект на лекот, велат истражувачите.

Сепак, студијата укажува на потенцијалниот позитивен ефект на PDE-5i врз здравјето на срцето кај општата машка популација.

PDE-5i не само што се безбедни, туку може да имаат важни кардиопротективни својства. Овие наоди укажуваат на итна потреба од адекватно контролирано испитување, велат авторите на студијата. Со ова се согласуваат и независните експерти.

Мислење на независни експерти

Иако е можно вијаграта да има некои кардиоваскуларни придобивки, ова ќе бара дополнително истражување, а оваа сегашна студија не го докажува тоа. Напротив, поверојатно е дека пациентите во оваа студија на кои нивните лекари им дале вијагра имале помали шанси да имаат срцеви заболувања, бидејќи ако пациентите имаат тешка срцева болест, честопати воопшто не им се дава вијагра, вели Дипак Бат, директор на Mount Sinai Heart за ScienceAlert, пренесува Дневник.хр.

Фармацевтските компании често финансираат студии на „дофат на рака“, како што е вмешаноста на Санофи во овој случај, вели Ниал Вит, фармацевтски хемичар на Универзитетот во Сиднеј во Австралија.

Убеден сум дека резултатите се реални. Веќе некое време знаеме за кардиоваскуларните придобивки од овие видови лекови. Фактот дека тоа му користи на вашето срце не е воопшто изненадувачки, додава тој.