Иранските авиокомпании ги укинуваат летовите до ЕУ

 Иранските авиокомпании ги прекинуваат врските со дестинации во Европската унија како одговор на новите санкции против земјата, соопшти денеска Иранската новинска агенција за труд (ИЛНА).

– Ниту еден ирански авион повеќе нема да лета за Европа, по казнените мерки, изјави генералниот секретар на здружението на иранските авиокомпании, Максуд Асади Самани.

ЕУ вчера воведе санкции против Иран чија цел е испораката на балистички ракети и дронови за Русија. Овие казнени мерки се насочени особено кон државната компанија Иран Ер, која повеќе нема да смее да продава билети во Европа.

Иран Ер беше една од ретките авиокомпании со директни врски од Европа до Иран.

Според ИЛНА, новите санкции го спречуваат и полнењето гориво на авионите на Иран Ер. Во извештајот се вели дека неодамна имало голема побарувачка за летови до дестинациите на ЕУ.

Санкциите нема да резултираат со отсекување на Иран од ЕУ. Многу деловни патници веќе летаат преку Истанбул и Дубаи, а Iran Air ќе продолжи да лета до турските дестинации.