Индија значајно  ги намалува царините за увоз на луксузни автомобили од Европа

Индија веднаш ќе ги намали царините за европски луксузни автомобили од 110 проценти на 30 проценти според новиот трговски договор со ЕУ, отворајќи строго контролиран пазар за производителите на луксузни автомобили како што се БМВ и Мерцедес-Бенц, изјави во четврток висок индиски функционер.

Индија и Европската Унија во вторник го финализираа долгоодложуваниот договор со кој ќе се намалат царините за повеќето стоки и ќе се зголеми трговијата во време кога владите ширум светот се обидуваат да се заштитат од нестабилните политики на САД, според Ројтерс.

Индија е трет по големина пазар на автомобили во светот по продажба, по САД и Кина. Но, нејзината домашна автомобилска индустрија е меѓу најзаштитените во светот, при што владата наплаќа царини помеѓу 70 и 110 проценти за увезените автомобили.

Иако населената земја се согласи според договорот постепено да ги намалува увозните давачки за автомобили над увозната цена од 15.000 евра (17.963 долари) на 10 проценти, деталите за тоа како ќе се спроведат намалувањата не се објавени.

Висок функционер на индиската влада, сепак, изјави дека Њу Делхи се согласил веднаш да ги намали увозните давачки за 100.000 автомобили со мотор со внатрешно согорување годишно, поделени во три ценовни групи.

Европските автомобили со увозна цена од 15.000 до 35.000 евра ќе имаат намалување на царината од 35 проценти, со годишен увоз ограничен на 34.000 единици, рече функционерот, кој побара да не биде именуван бидејќи договорот сè уште бара правна ревизија.

Автомобилите со цена помеѓу 35.000 и 50.000 евра ќе бидат предмет на царина од 30 проценти, а увозот ќе биде ограничен на 33.000 единици годишно, додека 33.000 автомобили со цена над 50.000 евра исто така ќе бидат предмет на царина од 30 проценти.

Министерството за трговија на Индија не одговори веднаш на барањето за коментар за деталите од договорот.

Во време кога сè повеќе Индијци живеат полуксузно, луксузните автомобили учествуваа со помалку од 1 процент од 4,4 милиони патнички возила продадени во земјата минатата година.

Пониските увозни даноци треба да бидат поттик и за други европски производители на автомобили како што се „Фолксваген“, „Рено“ и „Стелантис“, кои изјавија дека зголемената трговија ќе резултира и со зголемен трансфер на технологија и споделени синџири на снабдување.