Хрватска и Бугарија влегуваат во чекалницата на еврозоната

Хрватска и Бугарија утре треба да бидат примени во Европскиот механизам за девизен курс (ЕРМ II), еден вид чекалница за влез во еврозоната, пишува Дневник.хр, повикувајќи се на дипломатски извори.

Одлуката во понеделникот доби поддршка од работната група за еврото, која е исто така на агендата во четврток попладне и во петок, кога ќе се состанат Еврогрупата и Советот за финансии и економија.

Одлуката за пристапување во ЕРМ II ја носат земјите што учествуваат во механизмот, односно 19 земји од еврозоната и Данска, како и претставници на Европската централна банка. Одлуката за прием треба да биде објавена во официјална изјава во петок вечер, според дипломатски извори.

Земја-членка која сака да го воведе еврото мора да помине најмалку две години во ЕРМ II пред да ја прифати заедничка европска валута, што значи дека Хрватска може да смета на влез во еврозоната најрано во 2023 година, пишува Дневник.

На 10 јуни, Европската комисија објави извештај за конвергенција во кој се оценува напредокот постигнат од земјите-членки што не се во еврозоната за воведување на еврото. Според извештајот, Хрватска ги исполнува сите критериуми за влез во еврозоната, освен членството во Европскиот механизам за девизен курс (ЕРМ II).