Хамас: Нема да учествуваме во потпишувањето на мировниот договор во Египет

Палестинската исламистичка група Хамас соопшти дека нема да учествува во официјалното потпишување на договорот во Египет, чија цел е да се стави крај на војната во Газа. „Хамас нема да учествува во процесот на потпишување. Ќе присуствуваат само медијатори, заедно со американски и израелски претставници“, изјавија извори во организацијата.

Покрај САД и Египет, Катар помогна во посредувањето меѓу страните во конфликтот. Израел и Хамас не одржаа директни разговори за ставање крај на војната во Газа.

Претседателот на САД, Доналд Трамп, планира да отпатува во Египет во недела за официјално потпишување на договор меѓу Израел и Хамас. Светските лидери од повеќе од 20 земји ќе присуствуваат на самит закажан за понеделник во египетското одморалиште Шарм ел Шеик со цел да се стави крај на војната во Појасот Газа, објави египетското претседателство.

Собирот следува по договорот за прекин на огнот и ослободување од заложници постигнат претходно оваа недела меѓу Израел и палестинската милитантна група Хамас, како дел од мировниот план на САД.

20 светски лидери ќе присуствуваат
Претседателите на САД, Доналд Трамп и на Египет, Абдел Фатах ал-Сиси, ќе бидат копретседатели на состанокот, официјално наречен „Мировен самит во Шарм ел Шеик“, соопшти претседателството во соопштение објавено во саботата навечер.

Самитот има за цел да стави крај на војната во Појасот Газа и да ги зајакне напорите за воспоставување мир и стабилност на Блискиот Исток, се вели во соопштението. Имињата на учесниците не се официјално објавени.

Францускиот претседател Емануел Макрон и генералниот секретар на ОН, Антонио Гутереш, веќе го потврдија своето учество. Европската Унија ќе биде претставена на самитот во понеделник од претседателот на Европскиот совет, Антонио Коста.

Ќе присуствува и британскиот премиер Кир Стармер. Според владини извори, поканет е да присуствува и германскиот канцелар Фридрих Мерц. Некои медиуми објавија дека ќе бидат присутни и турскиот претседател, премиерите на Шпанија и Пакистан, како и монархот од Бахреин.