Голем скандал во австралиската војска. Илјадници жени биле жртви на сексуална злоупотреба

Четири австралиски жени војници поднесоа историска колективна тужба против австралиската војска, обвинувајќи ги австралиските вооружени сили за сексуална злоупотреба, вознемирување и дискриминација.

Адвокатите што ги застапуваат жените изјавија дека очекуваат илјадници поранешни војници на австралиската војска да се приклучат на тужбата, која беше поднесена во Федералниот суд на Австралија во петокот.

Според тужителите, чии имиња се чуваат во тајност од правни причини, инцидентите вклучуваат насилно притискање на ѕид и допирање, како и будење голи и покриени со модринки по забава со машки офицери.

Портпарол на австралиската војска изјави дека се развива нова стратегија за спречување на сексуално насилство и дека таквото однесување „нема место во вооружените сили“.

Тужбата е отворена за сите жени кои служеле во австралиската војска помеѓу 12 ноември 2003 година и 25 мај 2025 година, а е поднесена преку адвокатската канцеларија JGA Saddler.

„Жените не треба да бидат платени како мажите бидејќи не се толку силни“
Една од подносителките на барањето, офицер на воздухопловните сили, беше една од само двете жени во зграда со околу 200 машки вработени. Таа рече дека била подложена на сексистички коментари, несоодветни разговори  и прикажување порнографски фотографии без согласност.

Таа исто така рече дека нејзиниот претпоставен ѝ рекол дека „жените не треба да бидат платени како мажите бидејќи не се толку силни“.

Друга подносителка на барањето, офицер на морнарицата, рече дека била подложена на вулгарни коментари и несакано допирање за време на обуката, а додека била на мисија во странство, била зграпчена и бакната од колега додека се обидувала да избега.

Голем извештај за самоубиствата меѓу австралиските ветерани објавен минатата година откри дека имало околу 800 пријави за сексуален напад во рамките на војската помеѓу 2019 и 2024 година.

Сепак, се проценува дека стапката на непријавување е дури 60 проценти, а извештајот истакнува дека ова претставува „само дел од сите форми на сексуално недолично однесување што се случуваат во системот“.

„Жените се пријавија да ја бранат својата земја, а не себеси“
Адвокатот Џош Ајлвард од JGA Saddler, кој го води случајот, рече дека „заканата од војна не е најголемиот страв за жените во австралиската војска, туку стравот од сексуално насилство на работното место“.

„Тие се пријавија да ја бранат својата земја, а не да се бранат од своите колеги војници секој ден, додека се обидуваат да си ја работат својата работа“, рече тој.

Портпаролот на војската призна дека „сè уште има работа што треба да се направи“, додавајќи дека „сиот воен персонал има право на почит и заслужува позитивна работна средина во австралиските вооружени сили“.