ЕПП побара од земјите кандидати да имаат добри односи со сите соседи од ЕУ

Во манифестот на Европската народна партија (ЕПП)за европските избори во јуни, големата конзервативна групација малку се осврнува на проширувањето на ЕУ. Во делот „Нашата Европа е подготвена за нови предизвици“ околу пристапувањето во ЕУ прва се споменува Украина, а потоа Западен Балкан, Молдавија и Грузија. И од кандидатите за членство се бара да ги штитат човековите права и добрите односи со сите држави на ЕУ.

„Остануваме на ветувањата за пристапување на ЕУ и на напредната стратегија за проширување за Украина, Западен Балкан, Молдавија и Грузија. Секоја земја-кандидат мора да биде подготвена и за членство: во меѓувреме треба да преземеме посредни чекори и поблиска соработка за да ги ставиме кандидатите во најдобра позиција за приклучување. Сметаме дека сите земји кандидати ќе бидат обврзани со истите правила на патот до полноправно членство.

Ние не сакаме бесконечен процес, но мора јасно да се исполнат сите критериуми за пристапување (критериуми од Копенхаген) за Европската унија да се прошири. Секоја одлука мора да се заснова на конкретни резултати обезбедени од земјите кандидати. Секој кандидат го оценуваме врз основа на заслугите, почитувањето на демократските институции, владеењето на правото и заштитата на човековите права како и добрососедските односи со сите земји-членки на ЕУ. Ова се минималните предуслови за секоја држава која има аспирации за влез во ЕУ“, стои во делот од манифестот на ЕПП.