Ендрју Тејт во судски битки: Под истрага во Романија, Велика Британија и САД

Букурешт – Контроверзниот инфлуенсер Ендрју Тејт се пријави во полицијата во Романија по враќањето од САД, каде престојуваше откако му беше укината забраната за патување.

Пред полициската станица во Волунтари, на периферијата на Букурешт, 38-годишниот Тејт изјави: Среќен сум што се вратив во Романија. Ова е мојот дом, многу ја сакам Романија. Ќе останам тука во наредните недели, освен ако не одлучам поинаку.

Тој и неговиот брат Тристан Тејт (36) се под истрага во Романија, каде се соочуваат со обвиненија за трговија на малолетници, сексуална експлоатација и перење пари – тврдења кои тие категорично ги негираат, наведува Скај Њуз.

Во одделен случај, романското обвинителство ги товари браќата за формирање криминална група за сексуална експлоатација на жени. Овој случај неодамна беше вратен на обвинителите за дополнителна истрага.

Тејт браќата се соочуваат со правни постапки не само во Романија, туку и во Велика Британија и САД. Очекувањата се дека по завршувањето на романската истрага, тие ќе бидат екстрадирани во Велика Британија.

Полицијата во Бедфордшир (Велика Британија) има издадено европска потерница за нивно апсење, поврзана со одвоени обвиненија за силување и трговија со луѓе, кои датираат од периодот 2012-2015 година. Тејтови негираат каква било вина.

Дополнително, во Флорида (САД) неодамна беше поднесена тужба против браќата, во која се тврди дека тие присилувале жена да работи во секс-индустријата, ја измамиле да дојде во Романија и потоа ја клеветеле по нејзиното сведочење.

Американските власти, според извештаите, отвориле истрага за Тејт браќата по нивното пристигнување во Флорида. Главниот обвинител на државата, Џејмс Утмајер, потврди дека се води „активна прелиминарна истрага“ против нив.

Браќата Тејт, кои се двојни британско-американски државјани, се познати по своите контроверзни и често мизогини ставови, кои имаат голем одек на социјалните мрежи како ТикТок и X (поранешен Twitter).