ДУИ има следна цел – претседател на државата


Од прославата на роденденот на ДУИ (Фото: Б. Грданоски)

 

Чекор по чекор ДУИ сака да се проба на сите раководни места во државата. Имаше министри во клучните безбедносни и финансиски ресори, па претседател на Собранието, од 28 јануари ќе има премиер (додуша само неколку месеци), а следната цел што ја најавува партијата од Мала речица е претседател на државата. Барем така вели потпретседателот на ДУИ, Бујар Османи.

Одлуката Талат Џафери да ја води техничката е историска поради тоа што за првпат се скршени етничните табуа и монополи при што ниту една етничка група не е пофаворизирана од друга, рече Османи, во изјава за ТВ 21.

„Кога Талат Џафери беше избран за претседател на Собранието се направи вистински пуч. Но, сега кога е избран по вторпат, веќе не е новост бидејќи е скршен монополот на Албанец да биде претседател на Собранието. Идејата е да се разбијат етничките монополи. Вториот премиер повеќе нема да биде тема“, вели Османи.

Според Османи, во наредните години земјава ќе го добие и првиот претседател кој ќе биде етнички Албанец.

„Вториот монопол е на претседателот на државата, но тоа е следната мисија на ДУИ“, додава тој.