Дудуш го промовира Максим Димитриевски за лидер на СДСМ и мандатар

Градоначалникот на Шуто Оризари, Курто Дудуш, на својот Фејсбук профил објави фотографија со актуелниот градоначалник на Куманово, Максим Димитриевски и напиша: „Иден претседател на СДСМ и мандатар за нова влада, Максим Димитриевски?“

Иако во минатите мандати, двајцата беа претставници на владејачката партија, Дудуш на последните избори настапи како кандидати на ЛДП и ДОМ, додека Димитриевски „трчаше“ како независен кандидат.

Во изминативе денови пак како најголем фаворит да го наследи Зоран Заев на премиерската функција се појави името на Заменик-министерот за финансии и член на Извршниот одбор на СДСМ, Димитар Ковачевски.

Заев на средбата со лидерот на Алтернатива Африм Гаши, која се одржа во Клубот на пратениците и на која се преговараше за влез на партијата во Владата, беше придружуван токму од заменик-министерот за финансии.

Според биографијата објавена на официјалната страница на Владата, 47-годишниот Димитар Ковачевски е роден во Куманово. Доктор е на економски науки, вонреден професор на Факултетот за деловна економија и менаџмент на Универзитетот „Американ Колеџ“ Скопје. Тој е предавач на додипломските, постдипломските и докторските студии и е автор на голем број научни трудови од областа на економија и менаџмент објавени во меѓународни научни списанија и конференции.