Дебата на тема „Предизвиците за родовата еднаквост во процесот на носење одлуки“

Амбасадорот Дејвид Гир, шеф на Делегацијата на Европската Унија ќе ја отвори денешната онлајн дебатата „Предизвиците за родовата еднаквост во процесот на носење одлуки“, чија цел е да се зајакне вклученоста на жените во политичкото одлучување.

Организаторите на дебатата, Делегацијата на ЕУ во земјава, најавуваат дека на конференцијата ќе учествуваат и министерката за образование и наука Мила Царовска, министерка за труд и социјална политика Јагода Шахпаска, министерката за одбрана Радмила Шеќеринска, министерката за култура Ирена Стефоска и министерот за локална самоуправа Горан Милевски, но засега нема потврда од нивните ресорни министерства.

– Учеството на женски и машки претставници од владините тела вклучени во процесот на одлучување е од огромно значење за дискутирање на конкретни акции што може да бидат преземени за подобрување на родовата еднаквост во носењето одлуки и во практиката преку родово респонзивно буџетирање, истакнаа организаторите.

Дебатата се организира во рамките на проектот финансиран од ЕУ „Низ женски леќи: поткревање на политики и буџетски иницијативи, следење на спроведувањето на локалните акциски планови за родова еднаквост“ и претставува завршен настан за кампањата што проектот ја спроведе во периодот од 8 март до 8 април 2021 година (Месец на родова еднаквост во носењето одлуки).

Проектот воспостави структурна мрежа и соработка со локалните власти во 17 општини (Чаир, Шуто Оризари, Илинден, Брвеница, Теарце, Кавадарци, Неготино, Делчево, Македонска Каменица, Гевгелија, Радовиш, Крушево, Кривогаштани, Струга, Вевчани, Старо Нагоричане и Липково) со цел да се изготват политики и буџети што ќе одговараат на потребите на жените и на мажите, особено во време на криза.

Проектот се спроведува од страна на Центарот за истражување и креирање политики и Новинари за човекови права, Рурална коалиција и Асоцијација на млади и Ромки – Лулуди и ЕХО – Штип, како партнерски организации.