Цените на нафтата паднаа кон 68 долари

Цените на нафтата паднаа кон 68 долари на меѓународните пазари денес по сигналите од големите производители дека би можеле да ја зголемат понудата до крајот на летото и медиумските извештаи дека преговорите меѓу Техеран и Вашингтон за нуклеарната програма на Иран продолжуваат.

На лондонскиот пазар, цената на барел попладнето беше за 67 центи пониска отколку на вчерашното затворање на тргувањето, на 68,13 долари. Барелот падна за речиси иста количина на американскиот пазар, каде што се тргуваше за 66,29 долари.

Трговците беа преокупирани во петокот со одложувањето на редовниот состанок на Организацијата на земјите извознички на нафта (ОПЕК) и нејзините сојузници од недела за сабота и објавувањето на одлуката за зголемување на понудата.

Групата, според извори меѓу делегатите, ќе ја продолжи одлуката за зголемување на понудата во август, според извори од минатата недела.

„Доколку групата одлучи да ја зголеми понудата за 144.000 барели дневно во август, четврти месец по ред, како што се очекуваше, проценките за рамнотежата понуда-побарувачка за втората половина од годината ќе бидат повторно ставени на маса и ќе сигнализираат брзо зголемување на глобалните резерви на нафта“, објасни Тамас Варга од PVM.

Цените беа задржани и од извештајот на Axios дека САД имаат намера да ги продолжат разговорите со Иран за неговата нуклеарна програма следната недела. Според министерот за надворешни работи, Абас Аракчи, Техеран останува подготвен да ги почитува своите обврски според Договорот за неширење на оружје.

„Нашата соработка со МААЕ (Меѓународната агенција за атомска енергија), од очигледни безбедносни причини, ќе се канализира преку Врховниот совет за национална безбедност на Иран“, напиша Аракчи на X.

Претседателот на САД, Доналд Трамп, изјави во четврток дека ќе се сретне со ирански претставници „доколку е потребно“.

Министерството за финансии во исто време објави дека воведе нови санкции врз брокери во иранската трговија со нафта за да го зголеми притисокот врз Техеран и да му го отежни пристапот до финансиски ресурси, според министерот Скот Бесент.

Одделно, ОПЕК објави дека барелот од кошничката за нафта на нејзините членки се зголемил за 1,03 долари на 69,79 долари во четврток.