Бундесбанк: Германија оди кон рецесија и двоцифрена инфлација

Германија се движи кон рецесија додека инфлацијата треба да ја надмине границата од 10 отсто, објави Бундесбанк во својот месечен извештај во понеделникот.

„Постојат сè поголеми знаци на рецесија во германската економија во смисла на јасен, широко заснован и продолжен пад на економското производство“, се вели во извештајот.

Централната банка предвидува умерена контракција за тековниот квартал и поизразен пад на активноста во последниот квартал од оваа и првиот квартал од следната година.

„Високата инфлација и неизвесност во однос на снабдувањето со енергија и нејзините трошоци влијаат не само на индустријата интензивна за гас и електрична енергија и нејзиниот извозен бизнис и инвестиции, туку и на приватната потрошувачка и на давателите на услуги зависни од неа“, соопшти централната банка.

Бундесбанката не понуди никакви конкретни бројки и предупреди дека изгледите за најголемата економија во еврозоната остануваат покриени со неизвесност. Германската економија која се потпира на индустријата, е многу зависна од рускиот гас што ја прави особено ранлива на последиците од војната во Украина.

Во исто време, се гледа дека инфлацијата дополнително се забрзува и доаѓа со двоцифрена вредност во наредните месеци, се вели во извештајот.