Без предупредување, многумина останаа без пристап до Фејсбук профилот

Илјадници корисници ширум светот се разбудија со информацијата дека нивните профили на Фејсбук се заклучени без јасно објаснување.

Корисниците на популарната мрежа беа информирани дека нивната сметка на Фејсбук е оневозможена бидејќи не е во согласност со стандардите на заедницата и дека одлуката не може да се отповика.

Еден корисник изјави за Би-Би-Си дека не било дадено никакво објаснување или предупредување пред да се затвори сметката.

Од матичната компанија Мета велат дека се уште истражуваат за што се работи.

Во твит, Енди Стоун од Мета рече: „Свесни сме дека некои корисници имаат проблеми со пристапот до нивните профили на Фејсбук и работиме да го решиме овој проблем што е можно поскоро“.

Тој не откри колку корисници биле погодени, ниту за што точно се работи.

„Долго време немам објавено или коментирано ништо, така што е многу малку веројатно дека сум направил нешто што би можело да се протолкува како навредливо“, изјавила за Би-Би-Си Џен Робертс, корисничка чиј профил е затворен.

Но, и покрај тоа што не е страствен корисник на Фејсбук, таа утрово доби вознемирувачка порака дека нејзиниот профил е заклучен.

„На тој профил останаа сите слики од моите студентски денови и семејни настани. Го изгубив пристапот до спомените на возраст од 15 и повеќе години. Тоа навистина ме растажува“, додаде таа.