Анџелина Манго ќе ја претставува Италија на Евросонг во Малме (видео)

Анџелина Манго победи на „Санремо 2024′ со песната „La noia“ и со тоа ќе ја претставува Италија на Еросонг кој се одржува од 7 до 11 мај, во Малме, Шведска. 

Родена е во 2001 година, и со потекло од Маратеа. Пораснала опкружена со музика бидејќи нејзините родители се музичари, што ја поттикнало страста кон неа. Растејќи научила да свири гитара, пијано и секако да пее. Откако се преселила во Милано по смртта на нејзиниот татко, таа одлучила да ги продолжи претходните студии, како и да формира бенд со нејзиниот брат каде што пеела додека тој бил тапанар.

Манго е активна во музичката индустрија од 2020 година кога го објави својот прв сингл „Va tutto bene“ и набргу по нејзиното прво ЕП „Monolocale“. Во 2021 година, нејзината музичка кариера почнала да се забрзува. Таа дури настапила во текот на музичката недела во Милано во ноември 2021 година. Потоа, таа настапила на Санремо со песната „La tua buona colazione“, но не била избрана за еден од финалистите.

Анџелина веќе има четири платинести и две златни плочи зад себе, распродадена турнеја и бројни музички натпревари на кои славела.

Менаџер на Анџелина е Марта Дона, една од најуспешните жени во италијанската музичка индустрија, која минатата година соработуваше со победникот на Санремо, Марко Менгони, но и со бендот Måneskin, кој го воодушеви светот.

Славниот фестивал на италијански канцони „Санремо“ годинава собра 30 уметници кои во текот на пет вечери во познатиот театар „Аристон“ се обидоа да ја придобијат наклонетоста на публиката, радиото и новинарското жири.