Американците „полудеа“ по „југо“: Сè повеќе се бара, цените вртоглаво растат

Се чини дека моделот „југо“ е сè попосакуван меѓу Американците и заинтересираните се подготвени да издвојат голема сума за него.

И не се многу пребирливи. Се разбира, GVX и Cabrio се особено скапи, но сосема солидно минува и обичното „југо“ кое визуелно не се разликува значително од оние што доминираа на нашите патишта во 90-тите. Најновиот пример доаѓа од аукциската платформа Bring-A-Trailer.

Се работи за сосема обично „југо GVL“ од 1988 година, кое со помалку од 108.000 поминати километри е сосема обичен автомобил. Судејќи според фотографиите, станува збор за многу добро одржуван автомобил. Кај првиот сопственик беше до 2021 година, со оригиналниот 1,1-литарски мотор од 55 КС.

Примерокот е продаден за 9.001 долар, што потврдува дека 12.100 долари за кабриолет верзијата не биле само ненадеен или избрзан потег на некои „југоносталгичари“.

Американците, се чини, препознаваат одредени квалитети на производот на „Застава“. Сè повеќе луѓе го наведуваат лошото одржување како главна причина за досегашниот лош имиџ на „југо“ во Америка.

Така, во коментарите на оваа аукција, еден корисник наведува дека имал примерок што го изнајмувал за само 10 американски долари на ден и заработил пристојна сума. Тој вели дека било потребно само редовно да се сервисира автомобилот и навреме да се смени запчестиот ремен. Тој и денес вози „југо“ и ја фали неговата мала потрошувачка на гориво.

Во секој случај, „југо“ е дефинитивно повеќе барано „преку барата“. Којзнае, можеби наскоро ќе бидеме сведоци на извоз на добро зачувани половни автомобили од Македонија во Америка.