Албанија потпиша договор со ЕБОР за 45,7 милиони евра за проект за одржливост на електродистрибуција

 Министерот за финансии Петрит Малај попладнево преку објава на социјалните мрежи соопшти дека со Европската банка за обнова и развој (ЕБОР) е потпишан договор за долгорочен заем во вредност од 45,7 милиони евра, со многу поволни услови.

Договорот  го потпишаа потпретседателот на ЕБОР Матео Патроне, кој престојуваше во Тирана и директорката на електродистрибуција, Енеа Каракачи, во рамките на Проектот за одржливост на компанијата.

„Наша цел е да ја зајакнеме финансиската стабилност преку обезбедување зелени, поевтини и поодржливи извори на финансирање, напиша Малај.

За време на средбата, министерот Малај му изразил благодарност на потпретседателот на ЕБОР, Патроне за континуираната поддршка што институцијата и ја дава на Албанија низ годините.

Ова е прва официјална посета на Патроне на Албанија во неговата нова улога како потпретседател на ЕБОР, по што ќе ја посети Црна Гора.

-Нашата работа во Албанија и Црна Гора е од витално значење бидејќи сме водечка меѓународна финансиска институција во регионот. Оваа посета ја нагласува посветеноста на ЕБОР за поттикнување на економскиот развој. Зајакнувањето на нашите партнерства и ангажирањето со претставниците на јавниот и приватниот сектор на земјите ќе понуди одлична прилика да ги продлабочиме нашите врски во регионот, изјавил пред посетата Патроне.

ЕБОР започна со работа во Албанија во 1991 година и оттогаш има инвестирано повеќе од 2,2 милијарди евра преку 159 проекти. Во 2024 година, Банката инвестираше над 200 милиони евра преку 18 проекти во земјата.