Акциите на „Вирџин Галактик“ изгубија 3 отсто, откако Бренсон продаде удел вреден 300 милиони долари

Акциите на „Вирџин Галактик“ (Virgin Galactic Holdings Inc) паднаа за речиси 3 проценти во петокот, откако нејзиниот основач, британскиот милијардер Ричард Бренсон продаде дел од својот удел за речиси 300 милиони долари, јавви Ројтерс.

Бренсон продаде повеќе од 10 милиони акции во периодот од 10 до 12 август, според регулаторната документација од доцна четвртокот.

Овој потег доаѓа еден месец откако компанијата за вселенски туризам го заврши својот прв тест лет со екипаж во вселената со Бренсон на бродот. 

Парите од продажбата на акции ќе бидат искористени за поддршка на пандемиските бизниси за одмор и патувања на групата Вирџин на Бренсон, како и за развој на нови бизниси, рече портпаролот на британскиот конгломерат.

Најновата продажба го остави Бренсон со околу 46,3 милиони акции во вредност од околу 1,2 милијарди долари, од последната цена на затворање на акциите. Тој во април продаде акции во вредност од над 150 милиони долари.

Според податоците на „Рефинитив“, „Вирџин инвестментс“ на Бренсон е најголемиот акционер на компанијата за вселенски туризам и има удел од околу 22 осто заклучно со јуни.

Акциите на компанијата последен пат се намалија на 25,18 долари во петокот.