Пак горат танкери во Ормуз, наишле на мини

Два нафтени танкера се запалија во Ормуската Теснина откако наидоа на мини, соопштија поморските сили на Корпусот на Исламската револуционерна гарда, по експлозиите што синоќа беа регистрирани во неколку области во јужен Иран, меѓу кои и на островот Кешм.

Според Револуционерната гарда, танкерите се запалиле денеска во раните утрински часови додека се обидувале да поминат по „недозволена рута“. Засега не е познато дали овие инциденти се директно поврзани со експлозиите во јужните делови на Иран.

Иранската државна телевизија претпоставува дека експлозиите можеби се поврзани со воените активности на Иран во овој стратешки воден пат, истакнувајќи дека властите засега не потврдиле ракетни напади врз погодените области.

Полуофицијалната новинска агенција Тасним цитираше извор според кого експлозиите на островот Кешм не се поврзани со ракетни напади. Претходно вчера, истата агенција објави дека две ракети го погодиле островот, но без официјални информации за евентуална причинета штета.

Ормуската Теснина е цел на зачестени напади врз трговски бродови по избувнувањето на војната меѓу САД и Иран во февруари. Иран напаѓа бродови за кои тврди дека ги прекршуваат ограничувањата за пловидба, во обид да ја зацврсти својата контрола врз Теснината и да изврши притисок врз Вашингтон.

Извештаите за експлозиите доаѓаат неколку дена по американските напади врз островот Кешм, за кои американски претставник изјави дека биле ограничени и не претставуваат обновување на големите воени операции.

Американските вооружени сили синоќа соопштија и дека извршиле напад врз трговски брод што се обидел да ја прекрши американската блокада против Иран. Централната команда на САД соопшти дека американски авион пукал кон крмата на бродот и го онеспособил.

Земјите во регионот очекуваат дека американскиот претседател Доналд Трамп би можел да ги обнови нападите врз Иран по одржувањето на американските конгресни избори, додека Техеран повеќепати предупреди дека на новите напади ќе одговори со удари врз американски и израелски цели во соседните земји.