Боб поетот се сретна со Боб свештеникот: Папата Лав го прими Боб Дилан во Ватикан

Тие се двајца од најпознатите „Боб-овци“ во светот кои доаѓаат од американскиот Среден запад. Папата Лав XIV, чие родено име е Роберт Превост, и легендарниот музичар Боб Дилан, се сретнаа во Ватикан.
Лав и Дилан беа видени како се среќаваат во Апостолската палата во Ватикан, која служи како резиденција на папата. Папата носеше бела свештеничка одора, додека Дилан беше облечен во црно палто, со црни ракавици и црна дуксерка со капуљача.
Средбата беше организирана од свештеникот Антонио Спадаро, ватикански функционер познат по градењето мостови помеѓу црквата и пошироката култура. Претходно оваа година, Спадаро овозможи средба и помеѓу папата Лав и Пати Смит.

„Беше тешко да не се почувствува емоцијата од учеството во средба што носеше вистински историски дух, при што се чинеше дека, на секој чекор низ Апостолската палата, може да се случи апсолутно сè!“ – напиша Спадаро на социјалните мрежи.
Седумдесет и едногодишниот поглавар, роден во Чикаго, е добро запознаен со репертоарот на Дилан. Во предговорот на книгата што содржи збирка од неговите говори и размислувања, објавена во јули, тој цитираше една необјавена песна на Дилан од 1963 година, насловена „Go Away You Bomb“ („Оди си, бомбо“). Оваа песна од 1963 година претставува антинуклеарен протест, а папата Лав, кој инаку е критичар на војната во Иран, постојано ја нагласува позицијата на Католичката црква против нуклеарното оружје.
Сепак, Лав не е првиот папа со кој Дилан се сретнал. На еден црковен настан во Болоња, Италија, во 1997 година, на кој присуствуваше и папата Јован Павле II, Дилан изведе неколку свои песни, меѓу кои „Blowin’ in the Wind“, „Knockin’ on Heaven’s Door“ и „A Hard Rain’s A-Gonna Fall“. Јован Павле II, цитирајќи еден познат стих од песната „Blowin’ in the Wind“, рече: „Ме прашавте: колку патишта треба да помине еден човек пред да го наречете човек? Ви одговарам: еден! Постои само еден човечки пат, а тоа е Христос, кој рече: ’Јас сум патот’“.

Средбата беше потврдена од ватиканскиот весник, во кој се наведува дека папата „во приватна аудиенција го примил г. Роберт Ален Зимерман“, користејќи го роденото име на Дилан. (Си-Ен-Ен)