Кристијан Аманпур го напушта CNN во јуни, по 43 години

Познатата новинарка Кристијан Аманпур, која својата кариера ја започна како асистент во редакцијата за странски вести на CNN, а потоа стана светски познат новинар кој со децении известуваше од најразлични точки на планетата, планира во јуни да ја напушти оваа медиумска куќа.

„По многу месеци размислување и неколку непроспиени ноќи, одлучив да се разделам од CNN – мојот партнер во текот на 43 фантастични години!“, изјави Аманпур во понеделникот. Таа додаде дека „со нетрпение очекува нови, интересни проекти во иднина, а секогаш ќе навива за CNN и ќе се залага за зачувување на традицијата на независно новинарство во оваа куќа. Запомнете: секогаш бидете вистинити, а не неутрални.“

Веста за заминувањето на Аманпур доаѓа во момент кога CNN преминува под контрола на нов сопственик, компанијата „Скајденс“ (Skydance). Оваа компанија се соочува со долгови во висина од милијарди долари, како и со стравувања во јавноста дека би можела да го насочи уредувачката политика на медиумот кон одредени политички ставови и гледишта за други прашања.

Аманпур (68) од 2009 година води вечерна емисија на меѓународниот канал на CNN, а од 2017 година е и водителка на емисијата „Аманпур и компанија“ (Amanpour & Company) на телевизијата PBS.

„Кристијан добро размисли за оваа одлука, а за тоа разговаравме веќе неколку месеци“, изјави Марк Томпсон, извршен директор на CNN. „Како и многу други вработени во CNN кои денес ќе ја слушнат оваа вест, и мене ми е многу жал што таа си заминува, но сфаќам дека ова е вистинскиот момент за неа – како на личен, така и на професионален план.“

Во CNN работат многу новинари, дописници и водители, но малкумина од нив се толку силно поврзани со целокупниот бренд на оваа медиумска куќа како Аманпур. Откако во 1986 година доби ангажман во Источна Европа, таа се прослави известувајќи од конфликтните зони во Босна, Ирак и Авганистан. Во периодот од 1992 до 2010 година, таа работеше како главен меѓународен дописник на CNN. (Варајати)