Има ли ВМРО-ДПМНЕ договор за Албанец претседател со Таравари?

Претседателот на Движењето БЕСА, Биљал Касами, оценува дека е дојдено време Македонија да има претседател Албанец. Во интервју за весникот Лајм, Касами вели дека идеален кандидат за оваа функција е претседателот на Алијанса за Албанците, Арбен Таравари.

-Многу искрено разговаравме со докторот Арбен, тој дa е кандидат за претседател. Ја знаеме неговата загриженост за овие случувања во рамките на Алијансата. Сметам дека ова треба да заврши, а не да продолжи на ниво на закани и уцени. Во таа насока, посакувам што поскоро да се расчистат сите дилеми во Алијансата и силно верувам дека  Арбен Таравари може да биде многу добар кандидат за претседател не само на албанската опозиција, туку и кандидат за кој верувам дека би било прифатлив за сите граѓани на Северна Македонија. Верувам дека Северна Македонија е подготвена за претседател Албанец со целосен политички мандат, а не како симболиките што ДУИ ги понуди за овие 20 години владеење , што кулминираше со оваа техничка влада каде што имаме премиер Албанец, половина влада Албанци, но Албанците се подискриминирани од кога било, изјави Касами.

Таравари минатата недела потврди дека партиите од албанската опозиција му предложиле тој да биде нивен кандидат за претседател на претстојните избори, но истакна дека тој не е заинтересиран.

– Албанската опозиција има разговарано со мене јас да бидам претседателски кандидат, но јас не сум заинтересиран – рече Таравари.

Дали е заинтересиран или навистина не е, сепак, ќе стане јасно по разврската во Алијансата за Албанците а развојот на настаните потоа ќе покаже дали зад сите овие изјави има некаков договор со ВМРО-ДПМНЕ да поддржи Албанец претседател за да добие сигурен албански коалициони партнери.