Пожар во кривопаланечки Мезовски ливади

Седум пожарникари со две противпожарни возила попладнево го гаснеа пожарот кој избувна во месноста Мезовски ливади, во предградието на Крива Паланка. Опожарени се еден хектар обработливо земјиште, овоштарници и сува трева, а пожарот бил во близина на куќите во овој реон.

Од Територијалната противпожарна единица Крива Паланка посочија  дека брзата и навремена интервенција на пожарникарите спречиле да настане поголема материјална штета, како и проширување на пожарот.

-Дојавата за пожарот е примена околу 14:30 часот, по што на терен се упати едно возило со тројца пожарникари, а поради ветерот и топлото време, пожарот брзо се ширеше, па на терен интервенираа две возила и седум пожарникари. Пожарот е локализиран и ликвидиран до 17 часот, информираа од ТППЕ-Крива Паланка.

Ова е трет пожар во изминатото деноноќие. Пожарникарите од Крива Паланка овие два дена интервенирале на вкупно три пожари.

– Во текот на вчерашниот ден се случија два пожари, сите на отворен простор. Вчера околу 13:15 часот е примена дојава за пожар во село Киселица, местото Вели врв, каде изгореа околу еден хектар ниска вегетација, дабова шума и овошки. Околу 15 часот, пак, интервениравме на пожар во населбата Белево, каде во близина на игралиштето опожарена е сува трева на површина од околу 300 метри квадратни. На двата пожара интервенирано е со едно возило и тројца пожарникари, додаваат од ТППЕ.

Оттаму упатија апел до граѓаните крајно внимателно да се однесуваат при палењето стрништа и останати материјали при подготовка на земјоделските површини за пролетното обработување.