Амбасадорот Андреј Жерновски побара извинување од шефот на дипломатијата Тимчо Муцунски поради клеветите околу причините за неговото враќање во земјата. Откако романското МНР испрати информација до „Независен“ дека Жерновски не успеал да ги предаде акредитивите на претседателот поради тоа што процесот се совпаднал со изборите, а не поради инцидент или неприфатливо однесување, Жерновски го повика Муцунски јавно, преку Фејсбук , да се извини или ќе иницра тужба.
“На почетокот, сакам да изразам голема благодарност до Министерството за надворешни работи на Романија за професионалниот однос во процесот на соопштувањето на вистината. Благодарејќи на таквиот нивен пристап и доставената информација до македонските медиуми, односно до “Независен”, докрај се разобличија лагите на министерот Муцунски и владејачката ВМРО-ДПМНЕ.
Со дописот се потврдува дека одлуката да бидам отповикан од должноста амбасадор во Романија не е донесена, наводно, поради некакви незадоволителни резултати и работи со кои им се причинува штета на интересите на државата, како што постојано наведуват Муцунски и неговата партија, туку е донесена исклучиво поради партиско-политички причини. Да потсетам дека за овој предмет веќе се води судска постапка пред надлежните судови за незаконито и неосновано отповикување од функцијата амбасадор.
Со ова, изјавите на министерот Муцунски, во кои изнесе низа на невистинити информации за мојата работа како амбасадор во Романиј и дефинитивно стануваат основ за правна одговорност (клевета) за повреда на мојата чест, углед и личен и професионален интегритет.
Тој јавно изнесе клевети дека во Романија сум направил “дисциплинско прекршување на правилата на дипломатското работење коишто се навистина ноторни”. Неговата партија отиде чекор понатаму, па си дозволи на подмолен и крајно вулгарен начин да соопти дека “Жерновски не’ избламира пред членка на ЕУ”.
Вака, со дописот од официјален Букурешт, сите лаги и конструирани напади врз мене паднаа во вода. Инаку, црната кампања започна со веста дека, наводно, сум се степал на официјален прием во романскиот главен град и тоа во присуство на нивната министерка за надворешни работи. За таквата ступидна афера, мошне брзо добија жестока шлаканица во вид на дипломатска нота, па мораа да се извинуваат и да се правдаат.
Она што ќе остане е срамот на една партија, на еден министер и на една влада, кои во пустата желба за инсталирање на партиска дипломатија, ја избламираа државата и го доурнисаа тешко стекнатиот авторитет на нашата надворешна политика. Така вообичаено, барем на меѓународна сцена, завршуваат незрелите обиди за дискредитирање на оние кои размислуваат поинаку.
Истовремено, со вака изнесените невистини за амбасадор на државата, токму министерот е тој кој предизвика штета на интересите на државата и негативно влијае на угледот и кредибилитетот на нашата држава, која е должна да постапува согласно меѓународното право, дипломатските правила и обичаи. Со тоа, и дефинитивно се создадоа услови за скорешен почеток на судски процеси против него, кои очекувам да завршат со конечни и правосилни одлуки. Секој мора и ќе одговара за своите постапки.
Министерот Муцински има рок од 3 (три) дена јавно да ми се извини за сите изнесени лаги и клевети. По истекување на овој рок, со него ќе се гледаме на суд“, напиша Жерновски на социјалните мрежи објавувајќи фотографија на која се гледа како ги предава акредитивите во романското МНР, но не успеја кај претседателот бидејќи во меѓувреме ВМРО-ДПМНЕ дојдоа на власт и му ја стопирале постапката.
