Земјите од ЕУ сакаат да ја намалат компензацијата на патниците за доцнење на летовите

Земјите од Европската Унија се согласија да ја намалат компензацијата на патниците за доцнење на летовите, бидејќи авиокомпаниите се пожалија на големи финансиски оптоварувања.

Спогодбата меѓу членките на ЕУ треба да се дискутира во Европскиот парламент и може да биде предмет на понатамошни измени пред евентуалното усвојување.

Патниците моментално можат да побараат до 600 евра за доцнење од повеќе од три часа, според правило кое беше усвоено пред повеќе од 20 години.

Авиокомпаниите редовно се жалат на прекумерното финансиско оптоварување, кое Европската комисија го процени на 8,1 милијарди евра годишно.

За летови до 3.500 километри, како и за сите летови во Европа, патниците би имале право на компензација од 300 евра за доцнење од четири часа или повеќе. За подолги патувања, патниците би добиле 500 евра за доцнење од шест часа или повеќе.