Вучиќ и двајца министри се најадоа со 585 динари
Претседателот Александар Вучиќ, Синиша Мали и Томислав Момировиќ утринава појадуваа паризиер, јогурт, мајонез и леб. Се сретнаа во претседателството на Србија, направија сендвичи, појадуваа, а претседателот најави намалување на цените за уште 10 производи.
– Синиша и Тома отидоа во продавница. Купиле половина килограм паризер од домашно производство, две литри јогурт, два сава леба, две кесички домашен мајонез. Вкупната цена е 585 динари – рече Вучиќ и ја покажа сметката. Цената на паризерот, додаде тој, е за 140 динари пониска од претходно.
– Тоа е нешто што народот го сака, јас се уште го јадам често, особено во авион барам да ми направат сендвич од паризер – рече Вучиќ и најави повеќе производи со попуст.
– Ќе продолжиме со оваа акција, следната недела очекувајте попуст за најмалку 10 производи. Сакаме заедно да се бориме против инфлацијата, токму сега кога значително ги зголемуваме платите и пензиите. Сакаме да покажеме грижа за обичните луѓе – рече тој.
Од денеска до крајот на годината во продавниците на малопродажните синџири во Србија поевтинуваат 20 производи и тоа прехранбени и производи за лична хигиена и хемикалии за домаќинство под ознаката „Подобра цена“. Списокот вклучува млеко, јогурт, парчиња бело сирење, јаболка, компири, тестенини, пилешко месо (труп), салама во обвивки, безалкохолни пијалоци, кафе. Има и храна за бебиња, шампон за бебиња, бебешка бања, пелени за бебиња, како и шампон за возрасни, бања за возрасни, тоалетна хартија, хигиенски салфетки, како и детергенти за миење садови и алишта.
Во акцијата учествуваат компаниите Делез Србија, Меркатор С, ДТЛ, Лидл Србија, Универекспорт, ДИС, Метро, Домача трговија – Арома, Аман и Гомекс.
Одлуката за намалување на маржите за тие производи беше донесена минатата недела по состанокот на српскиот министер за трговија Томислав Момировиќ и претставници на трговските синџири.