Во истрагата за Лотарија опфатен и екс премиерот Ковачевски
Во истрагата за сомнежите за криминал во Државна Лотарија на Македонија опфатен е и експремиерот Димитар Ковачевски. Се проверува неговото работење и влијание во случајот.
Претходната влада пред повеќе од една година донела одлука да овозможи почнување постапка за основање три нови друштва за приредување интернет игри на среќа, кои ќе бидат под нејзина капа, односно под капата на Државната лотарија на Република Северна Македонија. Одлуката донесена на 14.6.2023 година е потпишана од првиот заменик на претседателот на Владата на РСМ, Артан Груби.Портпаролот на ВМРО-ДПМНЕ Наум Стоилковски, лани во октомври откри скандал и оттогаш јавноста не доби објаснување од засегнатите.
– Втора недела Артан Груби, ДУИ, Ковачевски, Лотарија, немаат одговор за скандалот – како директорот на Лотарија, Перпарим Бајрами изнајмува локал за цели 21.000 евра месечно од фирма чиј што дел е член на УО на Лотарија, Шабан Азмовски, Хамза и тоа со договор на 10 години? Ќе ги повторам прашањата кои што досега останаа неодговорени, до Артан Груби, но и до Спасовски, до Грковска, па и до Ковачевски кои што мора да одговорат, како тоа Перпарим, директорот од Лотарија најмува простор од фирма каде дел Шабан Хамза, член на Управниот одбор на Лотарија? Дали Перпарим од Лотарија ќе каже дали не знаел дека Шабан Азмовски Хамза го регистрирал името на порталот ХЕЈ на фирмата каде ќе истурат 2,6 милиони евра? Артан Груби мора да каже како тоа во Лотарија завршиле и Перпарим Бајрами и Шабан Азмовски Хамза, но и оној со фирмата „Медиа Девижн 2021“, Фидан Селими. А, Али Ахмети и Димитар Ковачевски мора да одговорат како сите големи државни тендери се вртат околу зетот на Ахмети и неговиот бизнис ортак Ерџан Сулкоски – повика Стоилковски.
Новата Влада го раскина Договорот за закуп за деловен простор склучен меѓу „Хеј“ ДООЕЛ и Државна лотарија, а премиерот Христијан Мицкоски изјави дека тој е основа за покренување кривична постапка и кривична одговорност за надлежните, бидејќи е потпишан по цена која не е пазарна туку дури и до три пати поголема од пазарната.
Утринава се извршени претреси во домовите на Груби и Бајрами, каде тие не се пронајдени, со што во голема мера се потврдуваат шпекулациите во јавноста за нивно можно бегство во Косово, иако и двајцата порачуваат дека „ќе се вратат, штом ќе завршат работа“.
Според повеќе медиуми, постои сомнеж дека Перпарим Бајрами е неколку месеци во Косово. За време на рацијата во резиденцијата на Бајрами, полицијата, наводно, открила и конфискувала готовина во износ од приближно 50.000 швајцарски франци.Полицијата во координација со јавен обвинител и судија на претходна постапка извршила рации на девет различни локации. Операцијата се фокусира на набавка на машини VLT (Video Lottery Terminal) за Државна лотарија, чија вредност е над 10 милиони евра.