Во гимназијата во Дебар за упис во прва година 204 места, 68 помалку од минатата учебна година
Во гимназиите „28 ноември“ во Дебар и „АТА“ во Центар Жупа, во прва година во учебната 2025/2026 година, можност за упис имаат 272 завршени деветоодделенци.
-Според Конкурс за запишување ученици во јавните средни училишта за учебната 2025/2026 година во нашата гимназија ќе може да се запишат 204 завршени основци на двата наставни јазика, што е за 68 места помалку споредено со оваа учебна година. Гледано одделно 68 ученици во 2 паралелки се со настава на македонски, додека 136 ученици во 4 паралелки со настава на албански наставен јазик, рече за МИА, Рамадан Имери, директор на гимназијата „28 ноември“.
Во изминатите учебни години, според директорот, во ова средно училиште можност за упис имаа 272 ученика, од нив 102 ученика во паралелките со настава на македонски, додека 170 на албански наставен јазик. Години на ред оваа бројка ниту од далеку не се пополнуваше. Во прва година, во учебната 2024/2025 беа запишани 155 ученици од нив 40 за настава на македонски, односно 115 на албански наставен јазик.
Во гимназијата „АТА“ во Центар Жупа во прва година, според директорот Сабри Асан, предвидена е бројка идентична како и оваа учебна година.
-Место има за 68 ученици во 2 паралелки, односно по 34 ученици во паралелката со настава на македонски и исто толку за паралелката на турски наставен јазик. Во тековната учебна година во прва година се запишаа 23 ученици, од нив 5 за настава на македонски и 15 на турски наставен јазик, рече за МИА, директорот.
Намалениот број ученици, појава присутна со години наназад, во средните училишта е последица на се помалиот број на ученици во основните училишта, поради масовната миграција на населението од двете општини.
Првото електронско пријавување на учениците ќе се врши 14 јуни до 17 јуни која и во двете гимназии за упис учениците треба да имаат минимум 60 поени. Второто пријавување од првиот уписен рок е на 30 јуни, додека августовскиот уписен рок е на 21 август, кога училиштата ќе може да го намалат потребниот минимум поени.