Утре во Тирана уште еден европски самит, ќе патува Александар Николоски

Годишниот самит ЕУ-Западен Балкан, организиран од независниот Институт „Пријатели на Европа“ со седиште во Брисел, утре во Тирана ќе ги собере претставниците на владите, економијата и граѓанското општество од ЕУ и Западен Балкан за да разговараат за патот напред и за Европа и за регионот.

Организаторите најавија дека учесниците на самитот ќе се обидат да одговорат на прашањата што значи брзо менувачката геополитичка ситуација за пристапувањето на Балканот во ЕУ, како може да се поттикне економијата на регионот преку создавање поволни услови за инвестиции и дали транспарентноста, отчетноста и реформите на судскиот систем ќе одговорат на предизвикот.

Најавените говорници се директорот на Генералниот директорат на Европската комисија за соседство и преговори за проширување, Герт Јан Копман, премиерот на Албанија, Еди Рама, македонскиот вицепремиер Александар Николоски, претседателката на српскиот парламент, Ана Брнабиќ, гувернерката на Централната банка на Црна Гора, Ирена Радовиќ и потпретседателот на Европската инвестициска банка, Роберт де Грот.

На списокот на говорници, меѓу другите, се наоѓаат претседателот на Центарот за европски политики Срѓан Мајсторовиќ, поранешниот европски комесар за проширување Штефан Филе, поранешниот помошник-генерален секретар на НАТО Џејми Шеа, шведскиот државен секретар за прашања на ЕУ Кристијан Даниелсон и холандската претставничка на Министерството за надворешни работи Хелен Бејкер.

Во најавата за состанокот, организаторите на самитот истакнуваат дека во 2025 година Западен Балкан ќе ја одбележи 30-годишнината од Дејтонскиот мировен договор, Бугарија и Романија ќе се приклучат на Шенген зоната, а Украина и Молдавија ќе ја завршат првата година од преговорите за пристапување и дека оваа година е затоа клучна година за проширувањето на ЕУ.

Во време на геополитички превирања – доаѓањето на новата американска администрација, парламентарните избори во Косово и Албанија, актуелните студентски протести во Србија – процесот ја принудува ЕУ да ги преиспита своите граници, безбедност и стратегија за добрососедски односи, додадоа организаторите на состанокот во Тирана.