УНКТАД ја намали прогнозата за глобален раст

Светската економија значително ќе забави оваа година поради војната во Украина и постепеното исчезнување на пандемиските стимули низ светот, наведува Конференцијата на Обединетите нации за трговија и развој (УНКТАД).
Светската економија годинава ќе порасне за 2,6 отсто, проценува УНКТАД, намалувајќи ја досегашната прогноза за еден процентен поен.

Руската економија нагло ќе падне, за 7,6 отсто, пресметаа тие, драстично менувајќи ја прогнозата според која годинава очекуваа раст на активноста од 2,3 отсто.

Во некои делови од Западна Европа и Азија, активноста значително ќе забави, предвидуваат тие, проценувајќи дека економиите на ЕУ и еврозоната ќе пораснат за 1,6 односно 1,7 отсто, околу половина процент послабо од претходно прогнозираните.

Се очекува германската економија да порасне за 1,4 отсто, што ќе ја намали сегашната прогноза на УНКТАД за 1,8 процентни поени, а Британија би требало да забележи речиси иста стапка на раст.

Се предвидува дека американската економија ќе порасне за 2,4 отсто, намалувајќи ја нејзината сегашна проценка за 0,6 процентни поени. Во Кина, се проценува дека активноста ќе порасне за 4,8 отсто, што е за 0,9 процентни поени пониско отколку што се очекуваше.

Трендот на затегнување на монетарната политика во развиените земји најверојатно ќе се забрза поради војната, а неколку земји во развој започнаа во слична насока во втората половина од минатата година, поради инфлаторните притисоци, посочува УНКТАД, предвидувајќи намалување на владините трошење.

„Многу земји во развој се бореа со пандемска рецесија и сега се соочуваат со тешка криза поради војната“, рече генералниот секретар на УНКТАД, Ребека Гринспан, предупредувајќи на негативна спирала на неликвидност, рецесија и стагнација на развој.

Нападот на Русија врз Украина доведе до вртоглав скок на цените на енергијата и суровините и ги поттикна инвеститорите да почнат да го повлекуваат капиталот од земјите во развој и да го пренасочуваат кон наводно побезбедни инвестиции, се вели во извештајот на УНКТАД.

Побогатите земји, од друга страна, прерано почнаа да се откажуваат од мерките за олеснување на пандемијата, што резултираше со ослабена побарувачка, поскромен раст и помали инвестиции ширум светот, предупредија тие.