Турција сака да посредува во спорот околу извозот на жито од Украина
Во меѓувреме од пристаништетот во Мариупол за прв пат исплови брод кој однесе 2.500 тони метал во рускиот град Ростов
Турција сака да посредува во борбата за блокираниот извоз на жито од Украина. Рускиот министер за надворешни работи Сергеј Лавров на 8 јуни ќе разговара со воена делегација во Турција за да ја истражи можноста за морски коридор, најави турскиот министер за надворешни работи Мевлут Чавушоглу. Тој за официјалната агенција Анадолија изјави дека има разговори со Обединетите нации, кои предложија формирање заеднички механизам за надзор за следење на бродските рути. Турција е отворена за таков предлог.
Сепак, сè уште има точки на несогласување меѓу Русија и Украина, вели Чавушоглу. На пример, Русија бара да се укинат западните санкции против осигурителната индустрија, бидејќи тие исто така влијаат на бродовите кои се потребни за извоз. Во меѓувреме, Украина сака да спречи доаѓање на руски воени бродови во пристаништето Одеса. Претседателите на Турција и Русија, Таип Ердоган и Владимир Путин, разговараа за ова прашање во понеделникот телефонски. Според Кремљ, Путин се согласил да го овозможи извозот на блокираното жито во координација со Турција.
Русија сега презеде контрола врз големи делови од брегот на Црното Море на Украина. Најголемото пристаниште во земјата во Одеса е блокирано од руски воени бродови. Милиони тони украинско жито, кое не може да се извезе и е од големо значење за светскиот пазар, се чуваат на доковите. Главни клиенти обично се земјите од Блискиот Исток и Северна Африка. Гладот таму моментално се влошува поради недостигот на увоз од Украина.
Во меѓувреме, брод го напушти пристаништето Мариупол за прв пат по неколку недели. Лидерот на проруските сепаратисти во источноукраинскиот регион Донецк, Денис Пушилин, преку сервисот Телеграм објави дека бродот е на пат кон рускиот град Ростов на Дон со метал тежок 2.500 тони. Украина го опишува транспортот како „грабеж“.
Од почетокот на мај, Русија, заедно со проруските сепаратисти, контролираат големи делови од долгогодишниот индустриски и пристанишен град; Пред десет дена се предадоа и последните бранители во тамошниот погон „Азовстал“. Пристаништето, најголемото на Азовското Море, исто така беше тешко оштетено во борбите. Сега руските војници го исчистија од мини, а отстранети се и морските мини на рутите.
Сега сепаратистите се обидуваат да конфискуваат неколку трговски бродови во пристаништето Мариупол. „Некои од бродовите се под јурисдикција на Донецката Народна Република“, вели Пушчилин, според новинската агенција Интерфакс. Тие ќе бидат преименувани и ќе станат дел од новоформираната трговска флота на самопрогласената република.
Владата во Киев ја обвинува Москва и нејзините сепаратистички сојузници за кражба на стратешки важна стока. Се вели дека до Русија биле испорачани до 500.000 тони жито од окупираните територии во Украина.