Трошоците за заштита на животната средина во 2024 повисоки за 18,3 % од претходната година

Вредноста на трошоците за заштита на животната средина во 2024 година изнесува 10 503 523 илјада денари и се повисоки за 18.3 % од претходната година, соопшти Државниот завод за статистика.

Во вкупните трошоци за заштита на животната средина според еколошката намена, најголемо е учеството на трошоците за управување со отпадни води  (32.7 %), потоа на трошоците за за циркулациски системи за снабдување со вода (29.0 %) и на трошоците за постапување со отпад (23.7 %). 

Трошоците за заштита на животната средина се состојат од две компоненти: инвестиции во средства за заштита на животната средина и трошоци за одржување на средствата за заштита на животната средина. Учеството на инвестициите во вкупните трошоци за заштита на животната средина изнесува 64.0 %, а учеството на трошоците за одржување во вкупните трошоци за заштита на животната средина изнесува 36.0 %.

Од вкупните трошоци за заштита на животната средина, најмногу трошоци се направени во индустријата и специјализираните производители, 5 141 293 илјади денари, односно 49.0 %.

Од направените трошоци за заштита на животната средина во индустријата и кај специјализираните производители, 30.1 % се наменети за инвестиции, а 69.9 % се за одржување на средствата. 

Од вкупните плаќања и надоместоци за извршени услуги за заштита на животната средина, најголемо е учеството на платените надоместоци за постапување со отпад, 89.9 %.