Трамп намалува некои царини за увезените делови за автомобили

Администрацијата на претседателот Доналд Трамп ќе го намали влијанието на царините за автомобили со ублажување на царините за увезените делови што се користат во автомобилите произведени во САД и задржување на царините за странски автомобили, соопштија официјални лица.

„Претседателот Трамп гради партнерство и со домашните автомобилски компании и со нашите вредни американски работници“, изјави министерот за трговија Хауард Лутник.

„Договорот е голема победа за трговската политика на претседателот бидејќи ги наградува компаниите што произведуваат во САД, а во исто време им дава простор на производителите кои ветија дека ќе инвестираат во Америка и ќе го прошират производството.“

Автомобилските компании претходно во понеделник објавија дека очекуваат Трамп да им помогне пред неговото патување во Мичиген, каде што работат три големи производители и повеќе од илјада подизведувачи.

Нивните здруженија минатата недела го повикаа да не воведува царини од 25 проценти на увезените автоделови, бидејќи тоа би можело да ја намали продажбата и да ги зголеми цените. Трамп претходно изјави дека ќе ги воведе овие царини до 3 мај.

Писмото, испратено од групи што ги претставуваат „Џенерал моторс“, „Тојота мотор“, „Фолксваген“, „Хјундаи“ и други, беше испратено до Лутник и секретарот за финансии Скот Бесент.

„Повеќето добавувачи немаат доволно капитал за справување со царинските прекини. Многумина веќе се во проблеми и се соочуваат со прекини во производството“, се вели во писмото, додавајќи дека „неуспехот на еден од нив би можел да доведе до запирање на целата производствена линија за автомобили“.