Трамп го прими во Белата куќа американскиот учител ослободен од Русија

Американскиот претседател Доналд Трамп го пречека американскиот учител Марк Фогел во Белата куќа доцна синоќа, откако Фогел беше ослободен од Русија каде што беше притворен од август 2021 година поради внесување на медицински препишана марихуана во земјата.

„Се чувствувам како најсреќниот човек на Земјата во моментов“, рече Фогел додека стоеше до Трамп.

Фогел ги пофали претседателот, американските дипломати и законодавците што работеле на негово ослободување.

„Воодушевен сум од она што сите го направија“, рече Фогел.

Трамп рече дека го цени она што Русија го направи со тоа што го пушти Фогел да си оди дома, но одби да ги прецизира деталите за каков било договор со Русија, освен да го нарече „многу фер“ и многу разумен.

Портпаролот на Кремљ Дмитриј Песков, денес изјави за новинарите дека САД ослободуваат руски државјанин од американски затвор како дел од договорот и дека нивниот идентитет ќе биде јавно објавен откако ќе пристигнат во Русија.

Трамп, исто така, рече дека денес ќе биде објавено уште едно ослободување заложници.

Мајк Волц, советникот за национална безбедност на Трамп, претходно во вторникот рече дека САД и Русија „преговарале за размена“ за ослободување на Фогел, но не даде детали за американската страна од зделката.

Во таквите зделки во последниве години, САД често ослободуваа руски затвореници кои Москва ги бараше во замена.

Наместо тоа, Волц го даде договорот за ослободување на Фогел во пошироки геополитички услови, велејќи дека тоа е „покажување на добра волја од Русите и знак дека се движиме во вистинската насока да ставиме крај на бруталната и ужасна војна во Украина“, инвазија што Русија ја започна против својот сосед во февруари 2022 година, со стотици илјади убиени или ранети од двете страни.

Трамп вети дека ќе посредува за ставање крај на руската војна против Украина пред да ја преземе функцијата на 20 јануари, но неговите соработници неодамна изјавија дека се надева дека тоа ќе го направи во првите 100 дена од неговата нова администрација, приближно до крајот на април.

„Од полагањето заклетва на претседателот Трамп, тој успешно обезбеди ослободување на Американците приведени ширум светот, а претседателот Трамп ќе продолжи се` додека сите Американци кои се притворени не се вратат во САД“, рече Волц.

Неодамнешното ослободување на шестмина Американци затворени во Венецуела и ослободувањето на Фогел се единствените јавно познати случаи.

Фогел патувал со мала количина на медицински препишана марихуана за лекување на болки во грбот.

Откако беше осуден од рускиот суд, тој почна да ја отслужува својата 14-годишна затворска казна во јуни 2022 година, при што администрацијата на поранешниот претседател Џо Бајден во заминување кон крајот на минатата година го класифицираше како незаконски притворен. (Глас на Америка)