Трамп би дозволил Иран да ги „уништи“ Лос Анџелес или Сан Диего!

Лидерите во Калифорнија го осудија Доналд Трамп, нарекувајќи го „непромислен“ и „растроен“, откако американскиот претседател сугерираше дека Иран би можел да ги „уништи“ Лос Анџелес и Сан Диего – два либерални града во оваа „сина“ (демократска) држава, која често е цел на неговата администрација.

На митинг во изразито републиканската држава Небраска во понеделникот вечерта, Трамп им рече на поддржувачите дека се надева на „огромна победа“ на ноемвриските избори на средината на мандатот, кои брзо се приближуваат. Потоа сугерираше дека високите цени предизвикани од војната со Иран се „мала цена што треба да се плати за да се одржи светот безбеден – и нашата земја безбедна“.

„Тие можат да уништат град“, рече Трамп во Гранд Ајленд. „Нека го уништат Лос Анџелес. Нека го уништат Сан Диего.“ Толпата аплаудираше.

„Тоа ќе заврши многу наскоро“, рече Трамп за војната.

Гувернерот и градоначалниците на градовите брзо ги осудија коментарите.

„Откако испрати Национална гарда и маринци да ја окупираат Калифорнија, Доналд Трамп сега вели дека нашите странски непријатели треба да ги ‘уништат’ Лос Анџелес и Сан Диего“, напиша гувернерот на Калифорнија, Гевин Њусом, на платформата X. „Тој е растроен и опасен.“

Њусом, демократ кој повеќепати влегуваше во судири со Трамп во текот на неговите два мандата, изјави преку профилот на својата канцеларија за односи со јавноста: „Да бидеме јасни: Претседателот заговара напад врз повеќе од 10 милиони американски жители во два од најголемите градови во Америка. Ова не е нормално. Ништо од ова не е. И ние ќе продолжиме да ги потсетуваме луѓето на тоа секој ден.“

Карен Бас, градоначалничката на Лос Анџелес, остро го критикуваше претседателот поради упатувањето на, како што ги нарече, „неодговорни закани“ кои „би можеле да ја загрозат“ безбедноста на вториот по големина град во Америка.

„Улогата на претседателот е да ја штити земјата, а не активно да ѝ се заканува и да поттикнува напади врз животите на Американците“, изјави таа.

Тод Глорија, градоначалникот на Сан Дијего, изјави дека неговиот град не е „колатерална штета“ во војната на претседателот.

„Ние не сме за жртвување. И никогаш не сме ‚мала цена што треба да се плати‘“, напиша тој на платформата X. „Држете го нашиот град надвор од вашата непромислена воена реторика.“

Сан Диего, осмиот по големина град во САД, е дом на клучна американска воена инфраструктура.

На интернет, коментарите – изречени во рамките на еден развлечен говор што траеше речиси час и половина – поттикнаа дебата за тоа што всушност сакал да каже претседателот. Дали станувало збор за груба шега за два града со претежно демократска ориентација, или пак, можеби ненамерно, тој открил доверливи разузнавачки податоци за потенцијални ирански цели? Некои конзервативни активисти тврдеа дека Трамп, со својот специфичен и недиректен начин на изразување, мислел на високите цени на горивото кога рекол дека тоа е „мала цена што треба да се плати“, а не на способноста на Иран да „уништи“ некој американски град.

Американските одбранбени претставници претходно изјавија дека Иран во моментов нема капацитет да изврши директен ракетен напад врз американското копно. Во претходните говори, Трамп тврдеше дека дозволувањето Иран да развие нуклеарно оружје би претставувало закана за американските градови. Во својот последен говор за состојбата на нацијата, тој изјави дека Иран работи на изработка на ракети што „наскоро“ би можеле да стигнат до американска територија.

Во Небраска, каде што неочекувано неизвесната трка за Сенатот ги вознемири републиканците, Трамп инсистираше на тоа дека му оди „одлично“ и ги повика поддржувачите да се однесуваат како неговото име да е на гласачкото ливче кога ќе гласаат во ноември. Но, во Калифорнија, каде што Стив Хилтон – републиканскиот кандидат за гувернер поддржан од Трамп – се обидува да направи изненадувачки пресврт, коментарите на претседателот не беа добро прифатени.

„Тринаесет милиони Калифорнијци живеат во окрузите Лос Анџелес и Сан Диего“, изјави Ксавиер Бесера, демократскиот кандидат за гувернер кој се обидува да ја преземе улогата на предводник на отпорот против Трамп, што претходно ја имаше актуелниот гувернер Њусом.

„Нивните животи не се ’мала цена што треба да се плати‘ ниту пак материјал за шегите на Доналд Трамп.“ (Политико)