Таравари: Зголемувањето на платата за 2.500 денари за сите вработени во јавниот здравствен сектор – голем чекор напред

Со најновото линеарно зголемување од 2.500 денари за сите вработени во јавниот здравствен сектор направивме уште еден голем чекор напред. Со тоа, вкупното зголемување на платите, заедно со ноемвриското покачување, достигнува 4.815 денари нето за сите здравствени работници, а за медицинските сестри ова зголемување изнесува дури 6.200 денари, изјави на денешната прес-конференција, министерот за здравство Арбен Таравари.

– Овие бројки не се само статистика – тие значат повеќе сигурност, поголема мотивација и заслужено признание за макотрпната работа на илјадници лекари, сестри, техничари и административен персонал. Просечната плата во здравството, сега се движи околу 50.200 денари – а тоа е повеќе од бројка, тоа е сигнал дека вложуваме сериозно во човечкиот капитал. Октомвриското зголемување од 10.49 отсто во комбинација со тековните мерки донесе кумулативен пораст на платите од 17.18 проценти. А, кога ќе го земеме предвид и фактот дека годишната инфлација изнесува околу 3.5 проценти, реалниот раст за 2024/25 година е 9.4 отсто. За споредба, во периодот од 2021 до 2023 година реалниот раст на платите беше само 3.8 проценти, рече министерот.

Тој посочи дека ова е највисок реален раст на платите во јавното здравство во последната деценија и доказ дека кога има политичка волја, има и резултати.

– Наша цел е да изградиме здравствен систем во кој професионалците ќе се чувствуваат ценети, мотивирани и подготвени да останат и работат тука, дома. Со ова зголемување, испраќаме порака дека достоинството на здравствениот работник не се преговара – тоа се брани и унапредува. И ова е само почеток. Министерството продолжува со работењето на системски реформи насочени кон унапредување на работните услови, дополнително образование и професионален развој, со цел да се обезбеди стабилност и квалитет во здравството, како и да се зајакне довербата на граѓаните во јавните здравствени услуги. Продолжуваме со конкретни чекори, со јасна визија и со непоколеблива решеност да го изградиме здравството кое нашите граѓани го заслужуваат, нагласи Таравари.

Тој смета дека денеска се испраќа силна и јасна порака: „здравствените работници се темелот на нашето здравство – и државата стои зад нив“.

– Како Министерство за здравство, заедно со Владата и синдикатите, активно изминатиот период работевме на унапредување на статусот на здравствените работници и овие промени не се настанати преку ноќ, нагласи Таравари.

Со линеарното зголемување од 2.500 денари најниската плата во здравство изнесува нешто над 27.000 денари, соопшти денес директорот на Фондот за здравствено осигурување, Сашо Клековски. Тој попладнево прикажа како растела најниската плата во здравството изминативе пет години.

„Во однос на најниските плати во здравството, значи платите што ги добиваат чистач или хигиеничар, во 2020 година сме почнале со нешто помалку од 15.000 денари за во 2022 година да се стигне до 18.000 денари, зборувам за нето бидејќи во нашата јавност подобро се разбира нето отколку бруто-износот. Со ова зголемување најниската плата во јавното здравство сега е нешто над 27.000 денари или околу 27.000 денари, што ќе биде релативно повисоко од најниската плата утврдена на национално ниво. Мислам дека со ова се трудиме да го вратиме достоинството на здравствените работници и на здравствениот сектор бидејќи нашата земја сè уште има релативно ниски плати во однос на платите во јавното здравство кај соседните земји“, рече директорот Клековски.

Тој потсети дека линеарното покачување е резултат на соработката на Министерството за здравство, Фондот за здравствено осигурување и синдикатите и најави дека таа соработка ќе продолжи и во следниот период. Ќе настојуваат да се намали бројот на колективните договори по кои се работи во здравството оти сега има вкупно 15 разни колективни договори.