СЗО: Нема докази дека вирусот се сменил, мерките да останат
Нема докази дека коронавирусот се сменил, ниту кога станува збор за формата на пренесување, ниту кога е во прашање сериозноста на болеста што ја предизвикува, предупреди денеска епидемиолог на Светската здравствена организација Марија Ван Кирков.
– Во однос на пренесувањето, нема промена, во смисла на тежина на болеста, нема промена, рече Кирков на прес-конференција.
Таа истакна дека е важно мерките за намалување и сузбивање на трансмисијата на вирусот да останат во сила.
Генералниот директор на Светската здравствена организација (СЗО), Тедрос Аданом Гебрејесус, пак, денеска изрази желба да продолжи соработката со САД, и покрај најавата на американскиот претседател Доналд Трамп дека ги прекинува врските со оваа агенција на ОН.
– Придонесот и дарежливоста на Владата на САД и граѓаните во светското здравство се огромни со децении и дадоа големи придобивки за јавното здравство ширум светот . СЗО сака оваа соработка да продолжи, рече Гребрејесус на виртуелната прес-конференција.
Трамп во екот на пандемијата на коронавирусот го прекина финансирањето на СЗО, која ја обвинува за попустливост кон Кина, а во петокот најави дека САД ги прекинуваат врските со оваа агенција на ОН.
– САД ќе ги пренасочат средствата кон други итни и глобални потреби на јавното здравство кои го заслужуваат тоа, рече Трамп.
Здравствената агенција на ОН, СЗО, е мултилатерална институција основана во 1948 година. Работата и мисиите на оваа огромна машинерија со 7.000 вработени, кои се присутни низ целиот свет, зависат од финансирањето на земјите членки и од приватни донации.
Со 893 милиони долари за периодот 2018/2019 година САД се главен донатор кој обезбедува 15 проценти од буџетот на СЗО, пред фондацијата на Бил и Мелинда Гејтс, Велика Британија и Германија и далеку пред Кина која дава 86 милиони.
Американските донации претежно одат во Африка и на Блискиот исток.
Околу една третина од парите одат во борба против вонредни состојби во здравство, а остатокот е наменет пред се за програми за искоренување на детска парализа, подобрување на пристапот до здравствени услуги и спречување и борба против епидемии.