Светска банка: Возачите на камиони на границите на Балканот губат 3.000 години

Светска банка објави дека возачите на камиони непотребно губат 26 милиони часа (речиси 3.000 години) чекајќи на граничните премини на земјите од Западен Балкан (Босна и Херцеговина, Србија, Црна Гора, Северна Македонија, Косово и Албанија).

За време на нејзината прва посета на Албанија во својство на потпретседател на Светска банка за Европа и Централна Азија, Антонела Басани се сретна со лидерите на земјите од Западен Балкан, претставници на Европската унија и меѓународни финансиски институции, како и други партнери на самитот на Берлинскиот процес во Тирана. Тие разговараа за мерките за зајакнување на регионалната економска соработка и интеграција.

Беше забележано дека економската интеграција е неопходен двигател на економскиот раст, вработеноста и просперитетот. Утврдено е дека економиите од Западен Балкан можат да го остварат својот потенцијал доколку ги отстранат пречките во трговијата со стоки и услуги и ги модернизираат платните системи.

„Западен Балкан има исклучителна шанса да влезе на пазарот на Европската унија од 450 милиони луѓе. Искуствата од целиот свет, како и од Западен Балкан, покажуваат дека пристапот до меѓународните пазари е неопходен за компаниите да постигнат раст и економии од обем. “, рече Басани.

Според неа, економската интеграција овозможува забрзано усвојување на нови технологии и побрз тек на нови идеи и иновации, како и поголема продуктивност, што е основа за растот на земјите со среден приход.

Беше нагласено дека возачите на камиони во моментов губат 26 милиони часови (речиси 3.000 години) секоја година непотребно чекајќи на граничните премини меѓу земјите од Западен Балкан.

Според новиот извештај на Светска банка за кој се разговарало на состаноците одржани како дел од Берлинскиот процес, доколку просечното време потребно за минување на границата се намали за три часа, што е разликата помеѓу просечното време на Западен Балкан и во земјите од Организацијата за економска соработка и развој (ОЕЦД), БДП во секоја земја од Западен Балкан може да се зголеми за три проценти на среден рок.

Беше посочено дека нивото на раст може да се зголеми за уште шест проценти со пристапувањето во ЕУ. Освен тоа, соседните земји-членки на ЕУ, како Романија, Унгарија и Бугарија, би можеле да постигнат дополнителен раст од 0,2 отсто поради зголемениот обем на трговска размена со земјите од Западен Балкан.

Светска банка веќе работи со партнерите за поедноставување на трговијата и сообраќајот во регионот преку инвестиции и реформи. Дополнително, Светска банка им дава поддршка на земјите од Западен Балкан да ги доближат нивните платежни системи до стандардите на ЕУ и им помага да ги исполнат барањата за приклучување кон Единствената зона за плаќања во евро (SEPA), што ќе го поедностави испраќањето дознаки и ќе ги намали нивните трошоци.