Средба на Грковска со Нефју, одговорен во САД за глобална борба против корупцијата

Вицепремиерката Славица Грковска, во рамките на Конференцијата на земјите потписнички на Конвенцијата на Обединетите нации против корупцијата, имаше состанок со координаторот на Стејт департментот на САД  за глобално спречување на корупцијата, Ричард Нефју. Грковска му се заблагодари на координаторот Нефју за поддршката што САД ѝ ја даваат на Македонија, особено во однос на имплементација на политиките за добро владеење, реформите во правосудството, како и јакнење на капацитетите на правосудните органи.

Таа го информираше Нефју дека на нејзина иницијатива е започната постапка за промена на Законот за рестриктивни мерки, во кој ќе се вклучат и правните акти на САД, по што македонските институции ќе имаат можност да преземат ефикасни мерки по објавувањето на конкретни имиња на листата на санкции на САД, за што веќе наредната недела ќе заседава работната група што таа ја предводи. Грковски извести дека во тек е и подготовка на друго законско решение, кое исто така ќе биде врзано со листата на санкции на САД, а кое ќе обезбеди друг вид на конкретни санкции.

Координаторот Нефју ги поздравил напорите на вицепремиерката Грковска за креирање на ефикасни механизми во справувањето со корупцијата, стои во владиното соопштение. Тој упатил јасна порака дека САД ќе продолжат да ги поддржуваат напорите на Македонија за превенција на корупцијата, вклучително и со мерки кои овозможуваат одговорност за оние кои им штетат на граѓаните и иднината на земјата.

Двајцата соговорници разговараа и за потребата од зајакнување на капацитетите на судскиот систем во делот на справувањето со корупцијата и организираниот криминал, при што заклучија дека тоа треба да биде еден од стратешките приоритети на нашата држава за наредниот период.

Вицепремиерката Грковска информираше дека во завршна фаза е и подготовката на Законот за конфискација на имот во граѓанска постапка, за кој веќе се одржа јавна расправа и добиено е мислење од Европската комисија, по што следи имплементирање на забелешките.