Советот на јавни обвинители не го дава Коцевски

Советот на јавни обвинители не дава да биде сменет Љупчо Коцевски. без присуство на јавноста и со мнозинство гласови на затворената седница даде негативно мислење по предлогот на Владата за разрешување на државниот јавен обвинител.  За прифаќање на предлогот гласаа само тројца, додека шест члена гласа против. За прифаќање на предлогот на Владата за разрешување на Коцевски гласаа Кети Петкова, Ардиан Демири и Марјана Илиевска.

 Советот на јавни обвинители ја исклучи јавноста од точката за разгледување на предлогот за разрешување на Коцевски, поради „сензитивноста на процесот и за заштита на угледот и интегритетот на јавниот обвинител“.

Владата  на 11 февруари 2025 година донесе одлука да поведе постапка за разрешување на државниот јавен обвинител Коцевски кој беше избран на оваа позиција пред една година, а неговиот мандат трае шест години. Министерството за правда образложи дека се бара смена на Коцевски поради „низа скандали, нарушена функционалност на Јавното обвинителство, нарушени меѓучовечки односи, незаконски постапувања и корупција, неефикасност во кривичното гонење и повреда на принципите на организација на Јавното обвинителство и самостојноста во вршењето на функциите на обвинителите во Вишото јавно обвинителство“.

Тој во меѓувреме порача дека не дава оставка и ќе се повлече само ако се утврди тешка дисциплинска повреда при неговото работење.

Премиерот Христијан Мицкоски на 23 март најави запирање на постапката за разрешување на Коцевски заради обемната истрага којашто се води во моментот по трагедијата во Кочани во којашто загинаа 59 млади луѓе. Експертите сметаат дека кога еднаш ќе биде запрена, постапката за разрешување мора да биде почната одново ако се бара подоцна повторно смена на јавниот обвинител Коцевски, така што ставот на Советот денес освен политичка немаше правна тежина.