Сопственикот на „Зара“ купи деловна зграда во Барселона за 250 милиони евра

Основачот на „Зара“, Амансио Ортега, купил деловна зграда во Барселона од „Блекстоун“ за 250 милиони евра (283 милиони долари), изјавија за Ројтерс во петокот два извори запознаени со трансакцијата.

„Блекстоун“ ја продал зградата од 28.000 квадратни метри на Авенида Дијагонал, која моментално ја изнајмува шпанската издавачка куќа „Планета“, на инвестициската фирма на Ортега, „Понтегадеа“, велат изворите.

„Понтегадеа“ и „Блекстоун“ не коментираа за договорот.

„Понтегадеа“, која поседува повеќе од 20 милијарди долари недвижнини, инвестирала во неколку канцелариски кули и луксузни згради во Европа и Северна Америка.

Исто така, го диверзифицирала своето портфолио со купување енергетски и логистички средства.

Ортега контролира 59,29% од „Индитекс“, сопственикот на „Зара“, преку Pontegadea Inversiones и  Partler Participaciones.