Скок на извозот на руски гас во Европа во првите четири месеци од 2025.

Русија од јануари до април испорачала 5,76 милијарди кубни метри гас во Европа, што е за 13 проценти повеќе од минатата година, покажуваат податоците од Европската мрежа на оператори на системи за транспорт на гас (ENTSOG). Во април, испораките се забавија поради повисоките температури и рекордните испораки на течен гас во Европската Унија, наведуваат руските медиуми, пренесе Хина.

Според овие податоци, извозот на руски гас во Европа преку „Турски тек“ во април се намалил за 11 проценти во споредба со март, на 1,25 милијарди кубни метри, што е најниско ниво од јуни минатата година. На годишно ниво, меѓутоа, извозот е зголемен за два проценти, забележуваат руските медиуми.

Просечното искористување на капацитетот на гасоводот „Турски тек“ во европски правец во април изнесуваше 41,7 милиони кубни метри дневно и беше за 1,9 проценти повисоко отколку во истиот месец минатата година. На месечна основа, се намали за осум проценти.

Гасоводот „Турски тек“ се протега од Русија до Турција преку Црното Море и има капацитет од 31,5 милијарди кубни метри гас годишно. Тој испорачува руски гас до Турција и земјите од јужна и југоисточна Европа, со почетна станица во близина на Рускаја во близина на рускиот град Анапа на брегот на Црното Море.

Во моментов е единствениот активен гасовод преку кој рускиот гас стигнува до Европа, по прекинот на испораките преку Украина.

Во 2024 година, испораките на руски гас преку „Турски тек“ до Европа скокнаа за 23 проценти, достигнувајќи 16,7 милијарди кубни метри, вклучувајќи рекордни 8,6 милијарди испорачани во Унгарија, пресмета ENTSOG.

Вкупниот извоз на руски гас преку цевководите до Европа минатата година скокна за 14 проценти, на 32,1 милијарди кубни метри. Покрај „Турски тек“, Русија ја снабдува Турција со гас преку гасоводот „Син поток“, исто така, преку Црното Море.