Сиљановска на неколку состаноци во ОН

Претседателката Гордана Сиљановска-Давкова во рамки на учеството на Генерално Собрание на Обединетите нации, присуствуваше на состанокот на Глобалната коалиција за справување со заканите од синтетички дроги и на дебатата на Советот за безбедност, кадешто оствари куси средби со повеќе лидери и претставници на меѓународни организации. 

Претседателката Сиљановска Давкова присуствуваше и на состанокот на Советот за безбедност на Обединетите нации, со кој претседаваше словенечкиот премиер Роберт Голоб, на тема „Одржување на мирот и безбедноста на Украина“, на којшто се дискутираше и беа разменети информации за безбедносната состојба во Украина.

Во рамки на учеството на Генералното собрание Сиљановска-Давкова оствари средба со извршната директорка на Агенцијата на Обединетите нации за родова еднаквост и зајакнување на жените, Сима Бахус.

Двете соговорнички споделија искуства за активностите што ги преземаат жените – лидери за промовирање и одржување на мирот и одржливиот развој и разменија мислења за чекорите што треба да ги преземат светските лидери со цел обезбедување на континуиран напредок во родовата еднаквост, јакнење на улогата на жените и нивна поголема вклученост во процесите на одлучување и креирање политики.