Шведска подготвува голем камбек за нуклеарната енергија

Шведската влада ќе мора да преземе директен удел во новите нуклеарни проекти бидејќи тие бараат големи инвестиции, предупреди денес извршниот директор на државната енергетска компанија Ватенфал.

Нов живот за нуклеарниот сектор
Шведската влада сака да внесе нов живот во секторот за нуклеарна енергија и нуди комбинација од евтини заеми и гаранции за цени на компаниите кои се подготвени да инвестираат.

Подружницата на Ватенфал, Видеберг Крафт, планира да изгради неколку мали, модуларни реактори со вкупен капацитет од околу 1.500 мегавати веднаш до нуклеарната централа Рингхалс и поднесе барање за финансирање во декември.

Проектот е огромен
Конзорциум од индустриски групи ќе преземе 20 проценти удел во компанијата на проектот, но планот е шведската држава да биде и директен сопственик, изјави извршната директорка на Ватенфал, Ана Борг.

„Проектот е, секако, огромен, а тоа значи дека нема да го консолидираме во билансот на состојба на Ватенфол“, рече Борг.

Компанијата објави основна заработка пред камати и даноци од 9,5 милијарди шведски круни (1,1 милијарда долари) во четвртиот квартал, што е 10 пати повеќе отколку во истиот период во 2024 година. Нето-приходот се намали за 2 проценти на 67,1 милијарди круни.

Преговорите не се завршени

Скокот на профитот одразува подобро хеџирање на ризиците од цените на електричната енергија во производството на Ватенфол во континентална Европа, како и подобрена достапност и цени за производство во нејзината матична земја Шведска, изјави Борг за Ројтерс.

Преговорите со владата и добавувачите сè уште не се завршени, додаде таа, одбивајќи да даде проценка на трошоците. Се очекува поголемиот дел од инвестицискиот буџет на Ватенфол од 165 милијарди круни до крајот на деценијата да оди во енергијата на ветерот и електричните мрежи.

„Голем дел од инвестициите во нови нуклеарни централи се планирани по тој петгодишен период“, заклучи Борг. Во 2025 година, „Ватенфал“ инвестираше 2,4 милијарди круни во нуклеарна енергија, што е за 47 проценти повеќе отколку во 2024 година, според деловните резултати. Во периодот од 2026 до 2030 година, тие планираат да инвестираат 10 милијарди круни.