Шведска ќе одвои 500 милиони евра за Западен Балкан во наредните седум години

Шведската влада вчера донесе нова седумгодишна стратегија за реформска соработка помеѓу Шведска и Западен Балкан и Турција. Постојаната соработка со земјите од регионот има за цел да ги зајакне условите за демократски и инклузивен развој.  Соработката со Западен Балкан ги вклучува Албанија, Босна и Херцеговина, Косово, Северна Македонија, Србија и Црна Гора.

Финансирањето на новата стратегија за периодот 2021-2027 изнесува 5,6 милијарди шведски круни (550 милиони евра), од кои 5 милијарди шведски круни се наменети за земјите од Западен Балкан, а 0,6 милијарди шведски круни за Турција.

Преку новата стратегија Шведска ќе ја интензивира својата работа на полето на човековите права, демократијата, владеењето на правото, родовата еднаквост, инклузивниот економски развој и заштитата на животната средина и борбата со климатските промени. Исто така, шведската поддршка ќе се фокусира и на миротворни и инклузивни општества и ќе гради широки и долгорочни односи помеѓу Шведска и земјите од регионот.

„Развојот на соседството на ЕУ е од важност за Шведска и за Европската Унија. Во интерес на Шведска е да продолжи соработката со земјите од Западен Балкан со цел да придонесе кон демократскиот развој со фокус на почитувањето на човековите права, родовата еднаквост и владеењето на правото“, изјави Пер Олсон Фрид, министер за меѓународна развојна соработка.  

Шведска е еден од најголемите билатерални донатори во земјите од Западен Балкан. Шведската поддршка ја надополнува работата на ЕУ во областите кои се приоритетни за Шведска. Согласно стратегијата, Шведска ќе продолжи да придонесува кон поддршката на ЕУ наменета за земјите од регионот во нивните реформски агенди и во нивното приближување кон ЕУ. Поддршката за граѓанското општество е од клучно значење за демократскиот развој и за шведската поддршка на земјите, што е одразено и во стратегијата.

Стратегијата за реформската соработка ја донесува шведската влада, но ја спроведува Шведската агенција за меѓународна развојна соработка – Сида, Шведскиот институт, Академијата „Фолке Бернадоте“ и Генералниот конзулат на Шведска во Истанбул.

Во Република Северна Македонија Шведска ќе иницира инклузивен процес за операционализација на новата стратегија. Амбасада на Шведска ќе упати покана до разните чинители да земат учество во овој процес.