Шведска ќе го укине данокот на пластичните кеси

Следниот ноември, шведската влада планира да го укине данокот на пластичните кеси, што по неговото воведување во 2020 година придонесе за пад на нивната продажба во земјата. Според проценката на владата, воведувањето на данокот донесе одредени негативни ефекти, со кои не се согласуваат еколошките организации, кои изразија загриженост за предложеното укинување.

Убедени сме дека граѓаните мудро ги користат пластичните кеси во секојдневниот живот, така што нема причина дополнително да се оданочуваат“, изјави шведската министерка за клима Ромина Пурмохтари за телевизијата СВТ оваа недела, според француската новинска агенција АФП.

Во соопштението за медиумите, владата дополнително објасни дека во однос на данокот, кој изнесува три шведски круни (0,25 евра), гледаат некои негативни ефекти, како што се високите административни трошоци и зголемената потрошувачка на алтернативни производи како што се хартиените кеси. Според нив, производството на истите може да бара уште поголема потрошувачка на енергија и вода.

Оваа скандинавска земја воведе данок на пластичните кеси во 2020 година, а податоците на Шведската агенција за заштита на животната средина покажуваат дека тоа придонесе за намалување на продажбата на пластични кеси во земјата. Додека просечниот граѓанин купуваше 74 такви кеси годишно во 2019 година, оваа бројка падна на 17 во 2022 година, што е далеку под целта на ЕУ од 40 купени кеси по лице годишно до 2025 година.

Одлуката на владата доаѓа само една недела откако десничарската влада, која ја презеде власта во октомври минатата година со поддршка на екстремно десничарските Шведски демократи, ги објави плановите за намалување на даноците за гориво. Гореспоменатите одлуки веќе предизвикуваат загриженост кај шведската јавност дека новата влада прави чекори наназад во оваа област по години пионерски шведски напори во спроведувањето на политиката за животна средина и клима.

Како одговор на одлуката на шведската влада, Агенцијата за заштита на животната средина и Агенцијата за поморство и водостопанство предупредија дека намалувањето или укинувањето на данокот може да доведе до зголемување на бројот на пластични кеси во природата. Истовремено, се зголемува ризикот дека целта на ЕУ нема да се постигне навреме.

„Данокот на пластичните кеси покажа дека финансиските мерки се ефикасен начин за насочување на потрошувачката“, ја сумира АФП изјавата на агенцијата за заштита на животната средина.