Шпанија: Десничарот Феихо го загуби првото гласање да стане премиер

Лидерот на шпанската Народна партија Алберто Феихо во средата не доби доволно поддршка во шпанскиот парламент за да биде именуван за премиер.

Конзервативниот шеф требаше да обезбеди поддршка од најмалку 176 од 350 пратеници во парламентот – апсолутно мнозинство – за да биде потврден како премиер на гласањето во средата. Но, само 172 пратеници гласаа за неговата кандидатура, а 178 гласаа против.

Иако Народната партија освои најмногу гласови на националните избори во јули, не доби мнозинство, а нејзината близина со екстремно десничарската партија Вокс го оневозможи Феихо да обезбеди дополнителна поддршка од другите групи во парламентот.

Уставот на Шпанија бара парламентот да гласа за кандидатурата на Феихо за формирање влада по втор пат во 48 часа. Лидерот на Народната партија треба само да обезбеди просто мнозинство од гласачките ливчиња – повеќе да отколку против – но се очекува мнозинството пратеници уште еднаш да ја отфрли неговата кандидатура во петок.

Ако се случи тоа, кралот Фелипе Шести ќе мора да ги повика политичките лидери назад во палатата Зарзуела и уште еднаш да ги испита за тоа кој мислат дека треба да биде премиер.

Преодниот премиер и лидер на Социјалистичката партија Педро Санчез е добро позициониран да остане на функцијата, но за да го стори тоа ќе треба да ги убеди пратениците од каталонската сепаратистичка група Жунтс да ја поддржат неговата кандидатура за формирање влада.

Отфрлањето на кандидатурата на Феихо во средата автоматски започнува со одбројување за нови избори во Шпанија. Доколку пратениците не му дадат поддршка на Феихо или на друг кандидат за формирање влада во рок од два месеци, парламентот ќе се распушти и ќе се одржи ново гласање на 14 јануари 2024 година.