Шолц: Не можам да замислам Нетанјаху да биде уапсен во Германија

Берлин – Германскиот канцелар Олаф Шолц изјави дека не може да замисли извршување на налогот за апсење на израелскиот премиер Бенјамин Нетанјаху за време на негова можна посета на Германија, јави ДПА.

Нетанјаху денеска пристигна во Будимпешта, што е негова прва посета на Европа откако Меѓународниот кривичен суд (МКС) издаде налог за апсење на израелскиот лидер поради акциите на неговата земја во Појасот Газа. Унгарија денеска соопшти дека планира да се повлече од МКС.

– Не можам да замислам тој да биде уапсен во Германија, рече Шолц на заедничката прес-конференција со јорданскиот крал Абдула Втори во Берлин.

Канцеларот додаде дека германската влада јасно го кажала својот став по прашањето за притворање на Нетанјаху.

Германската министерка за надворешни работи Аналена Бербок претходно денеска ги критикуваше постапките на Унгарија. Таа на маргините на состанокот на министрите за надворешни работи на НАТО во Брисел рече дека денеска е „многу лош ден за меѓународното кривично право“.

– Во Европа никој не е над законот и тоа важи за сите области на правото, додаде Бербок.