СДСМ и ЗНАМ во жесток клинч: Дали Максим Димитриевски е најголемата измама?
Едните тврдат дека градоначалникот на Куманово Максим Димитриевски е најголемото политичко разочарување и најголема измама. Другите велат дека ваквите изјави биле очајнички обиди за дефокус.
Опозициската СДСМ и владејачката ЗНАМ (која произлезе од незадоволните социјалдемократи) денеска уште еднаш влегоа во жесток политички клинч разменувајќи си политички обвинувања.
Орагизацискиот секретар на СДСМ, Мартин Костовски, на прес-конференција ги даде овие оценки за Максим Димитриевски:
„Ветуваше независност и чесност, а заврши како тројански коњ, слеп извршители на политичката агенда на ВМРО-ДПМНЕ, небитен фактор и лажен патриот, целосно заглавен во криминал и корупција. За само една година, Димитриевски ги погази сите свои изборни ветувања. Неговиот лажен патриотизам излезе на виделина, сѐ што кажа порече.
Максим јавно се колнеше дека нема да прифати внесување на Бугарите во Уставот без одложена примена. Пред два дена, смени лента, се откажува од тој став, сега веќе не е за одложена примена. Ветуваше борба за правда, а денес молчи пред корупцијата на коалициските партнери од ВЛЕН. Ваква сервилност, вакво коленичене пред ВЛЕН досега немало.
Вистината е едноставна: Максим Димитриевски не е ништо друго освен обичен привезок на Христијан Мицкоски и слуга на политиките на ВМРО-ДПМНЕ“.
По овие обвинувања прес-конференција одржа Никола Мемов од ЗНАМ велејќи дека опозициската партија прави „очајнички обиди за дефокус“ по нивниот конгрес.
„СДСМ не може ниту да замисли, а камо ли да организира Конгрес со над 420 делегати, со јасна национална визија и со масовна поддршка од народот. Нивниот ‘конгрес’ би можел да се одржи во поширока канцеларија, затоа што вистинските социјалдемократи одамна ги нема, и народот ги напушта засекогаш, рече Мемов.
Тој го обвини Мартин Костовски, за „учество во уривање на уставниот поредок“ и „распродажба на националните интереси“.
„Јазикот, историјата, културата и самобитноста на македонскиот народ не се предмет на преговори – тие се темелот врз кој стоиме! Македонија ќе биде членка на ЕУ, но не како народ без име, туку како Македонци со гордост, идентитет и достоинство! Нашиот пат е европски, но нашата душа е македонска“, истакна Мемов.